U·IATTIMGIPAONI
SHILLONG: Re·baenggipa 2024 bilsion Khasi Hills Autonomous District Council (KHADC) aro Jaintia Hills Autonomous District Council (JHADC)-ni election-koba ong·atna siengani gimin Congress dol, mikkang antioni candidate-rangko sandina a·bachengatgnok.
Iani bidingo kobor ra·timgiparangna talataniko on·angengon, KHADC aro JHADC election-o susana gita uamang October 23 tarik dipet candidate-rangko seokna kamrangko a·bachengatgnok aro iani bidingo an·tangtangni candidate-rangko ta·raken biming watatchina gita uamang block committee-rangna seatgnok ine Meghalaya Pradesh Congress Committee (MPCC)-ni president Vincent H Pala parakataha.
“Candidate-rangko chinga November jao nipilanggen aro seoka man·gipa candidate-rangni bimingko December jao parakatgen,” ine Pala aganaha.
December jao candidate-rangko seokani kamrang matchotahaosa badita sak candidate-rangko susaatgen, ukode ma·sigen ineba ua aganaha.
Election-ni tarikrangko parakatahaon candidate-rangni bimingko uamang jinmana parakatgen ineba Pala aganaha.
Pala-ni aganani gitade, district council election-rangna candidate-rangko seokanio high command-onide maming champenganirang dongrongjani gimin candidate-rangko seokanide block committee-rangosa pangchakbataigen.
“Uni gimin block committee-rang sako candidate-na namnikbatenga, unosa candidate-ko seokanide pangchakaigen. Congress-ni tikitna membor-rangoni jeba dorgastoko galna man·aia,” ine ua aganaha.
Khasi-Jaintia aro Garo Hills jolrangoni bang·a dilgiparangan Congress-ni tikito susana skaniko dilgiparangna parakmanaha ineba MPCC-ni president parakataha.
Ia district council election-o susana gita MLA-rangoniba Congress-ni tikitna dorgasto galgiparang dongnaba gnang ineba ua aganaha.
“MLA-rangkoba district council election-o susana on·enga dipetde chinga darangkoba champengani dongjawa,” ine Pala aganaha.