U·IATTIMGIPAONI
SHILLONG: Rikman Momin-ko BJP Meghalaya-ni gital president seoka antigittam gapangjok indiba da·onan gital executive committee aro office bearer-rangko songku-jaenga.
Shillong Times-ni kobor ra·timgiparang baksa agangrikmitingo, ‘gital team-ko mikkang ja November jani skanggipa antirango songnaba donga’ ine Momin, aganaha.
Uandake da·onaba executive committee-ko songku-jaengani gimin mat-nanganina aganchakataon, Momin, indine aganaha, “da·ode anga gimik district-rangona wene party-ni unit aro mandal-rangko grongenga aro party-ko a·bachenggipa level-oni bilakatna uamang baksa agangrikenga.”
Rikman Momin, October 3 tariko Meghalaya Bharatiya Janata Party (BJP)-ni gital president-ni kamko jako ra·aha. Gitcham president Ernest Mawrie-ko party president post-oniko ra·galani ja·man Rikman-ko seokskaha. Minggipin Ernest-ko ra·gale Rikman-ko president seokanio adita kattarang nakatahachim, indiba ja·man gimikan namniktoke ra·chakaha.
