U·IATTIMGIPAONI
TURA: Sonibar salo, A·chik Literature Society (ALS), NEHU Tura Campus-ni Garo Department baksa nangrime, Regional Writers’ Meet-ko Tura-ni Christian Girls Higher Secondary School-o ong·atangaha aro ia program-ko ong·atanio Mendipathar College, University of Science & Technology (USTM), Tura Don Bosco College, Tura Don Bosco College Higher Secondary School, North-Eastern Hill University-ni Department of Garo, MSW, ICFAI University, Tura Government College, Durama College, Miriam Russel Women’s College aro PASF-Abong Noga College-ni chatro chatrirang bakko ra·e an·tangtangni segimin poedorangko poraitokaha.
Ia poedoranga ma·a-paani dedrangna ka·saani, seng·ani andalako amani, a·songtangna ka·saani, ku·tangna ka·saani, daka-rikani, janggi tanganio rasong chaani aro uandakgipa pangchakanirango segimin poedorang ong·achim.
Ia Writers’ Meet-ko ong·atanio ki·tap serakgiparangoni saksa Kroshnil D Sangma, uni segimin ‘Chera Sola’ poedoko poraiatan baksana ia sal somoirango Garo Hills-ni Lower Primary skulrango ong·enggipa obosta aro neng·nikanirangni gimin seaniko poraiataha.
Ia program-o ki·tap serakgipa sakgipin Hiracliush M Sangma-ba an·tangni poedo minggniko poraiataha aro unbaksana ALS-ni executive membor-rangba an·tangtangni poedorangko poraitokaha.
Ia Writers Meet-ko ong·atanio ALS-ni president Prof Caroline R Marak, jinmana aganprakangengon, A·chik poedo aro gipin bimangrango seanirangko namdapatna nangengani gimin aganangaha.
Ia tom·anio dongpae jinmana aganprakanggipa gipin manderangara, NEHU Tura Garo Department-ni Head Dr Jacqueline R Marak, Dr Angela W. Ingty, Prof Fameline K. Marak, Dr. Dokatchi Ch. Marak, Venybirthseng Ch. Marak, Dr. Jobillyne D. Shira, Dr Colnat B. Marak aro gipinrang ong·a.
