U·IATTIMGIPAONI
SHILLONG: Meghalaya a·doko Mid Day Meal (MDM) ba PM Poshan-ni kamrangko ka·enggipa manderangni dingtang dingtang neng·nikani aro nangnikanirangni bidingo MPCC-ni secretary aro Mawhati-ni MLA Charles Marngar, a·dok sorkari baksa agangrikna ku·rachakaniko on·ataha.
Koborko on·ani gitade, dingtang dingtang skulrango MDM-ni cha·anirangko song·e on·enggipa aro uamangna dakchake on·enggipa manderangni man·na nangkuenggipa jagittamni dormaharangko da·onan on·kujaengani a·sel MDM worker-rang neng·nikanirangko chagrongna nangtokengachim.
Indake ong·engon, adita salrangna skang Ri Bhoi a·jani MDM worker-rang, MPCC-ni secretary aro Mawhati-ni MLA-ko grongenba, iani bidingo agangrikaha aro ua uamangni neng·nikanirangko sorkari baksa agangrikna ku·rachakaniko on·ataha.
“Skulrango MDM-ni cha·anirangko song·time on·enggipa manderangan skulrango poraienggipa bi·sarangni namgnina kamko ka·enggiparang ong·ani gimin anga uamangni neng·nikanirangko namatna gita sorkari baksa agangrikgen,” ine Marngar aganaha.
A·dokni dingtang dingtang skulrango Mid Day Meal (MDM)-ko song·e on·enggipa aro uamangna dakchakenggipa manderangna, uamangni man·na nangkuenggipa jagittamni dormaharangko da·onan on·kujaengani gimin re·baenggipa jaonide kamtangtangko dontongna gita adita salrangna skangsan MDM Workers Union ka·mikkenataniko on·angahachim.
A·dokni dingtang dingtang skulrango MDM-ko song·e on·enggipa manderangna aro uamangna dakchakenggipa manderangna ia jagittamni dormaharangko October 20 tarikni gisepo on·jagenchimode mikkang ja dipetde kamrangko dontongatgnok ine MDM Workers Union mikrakataniko on·angaha.
“Chinga mikkang jaonide kamrangko ka·gija jinma jingjengatanirangko dakangskagnok. Chinga kamrangko dontongatahaode skulrango poraienggipa bi·sarangsa neng·nikanirangko man·skana nanggnok,” ine union-ni dilgiparang parakataha.