U·IATTIMGIPAONI
TURA: A·chikkukoba Constitution-ni Eighth Schedule-o napatchina gita didie, A·chik Holistic Awakening Movement (AHAM), a·songni Prime Minister Narendra Modi-na sedoataha.
A·chikkukoba Eighth Schedule-o napatchina gita a·songni Prime Minister-ko didiatengon, A·chikkuko Constitution-ni Eighth Schedule-o napatchina gita dabianiara da·o bilsi 30 batpilengahachim indiba da·alonan A·chikkuko Eighth Schedule-o napatgija donchipaniara A·chik jatko chonnikani gita ong·enga ine AHAM-ni president Georgeprince Ch Momin parakataha.
“Batanggimin bilsirango ma·mong sorkari, dingtang dingtang committee-rangni ku·pattianio pangchake India a·songni ning·o donggipa dingtang dingtang ku·sikrangko Indian Constitution-ni Eighth Schedule-o napataha indiba ku·sikrangko Eighth Schedule-o napatna gita 1996 bilsini Pahwa Committee aro 2003 bilsini Sitakant Mohapatra Committee gita dakgipa committee-rangni niamrangkode chu·sokatkuja. Chinga Garo Hills-o songdongenggipa manderangba A·chikkuko Constitution-ni Eighth Schedule-o napatgen ine ka·dongsoengachim indiba da·alonan chingni dabianirang chu·sokgipa ong·kujaenga,” ine AHAM-ni president parakataha.
Bang·a biaprangon A·chikkuko ku·tang dake aro lekka poranioba jakkaltokenga ine janapatengon, A·chikkuko Assam, Tripura, Nagaland, Arunachal Pradesh, West Bengal aro Bangladesh a·songo songdongenggipa manderangba jakkaltoka ine Momin parakataha.