SSLC-ko Top 10-o pass ka·giparangna indin admission on·gen: Edu Minister
U·IATTIMGIPAONI
TURA: Meghalaya a·dokni skanggipa Chief Minister aro Garo Hills Autonomous District Council (GHADC)-n skanggipa Chief Executive Membor (CEM) Captain Williamson Ampang Sangma-ni chang 33-gipa siani salko Budbar salni bako Garo Hills-ni dingtang dingtang biaprango maniangaha.
Tura-o Capt WA Sangma-ni siani salko Tura-ni William Point-o maniangaha, jeon dingtang dingtang dilgiparang, ua biapo tarie dongipa Capt Sangma-ni mangkrongo pulrangko done una mande ra·pilskaaniko dakangaha.
Uni ja·man, Capt Sangma-ni noko donggipa uni gopramonaba jinma re·ange, una mande ra·pilskaaniko dakangaha aro uano pamongrangoni saksa Abhik Arengh, Capt Sangma-ni janggi tanganina Nokgipa Isolko mittelpile, A·chik a·songna aro uni nokdangnaba bi·chakangaha.
Apsan daken, Captain Williamson Ampang Sangma-ni chang 33-gipa siani salko South Garo Hills a·jani Captain Williamson Memorial Park-oba maniangaha aro ia manianio, Meghalaya a·dokni Education Minister Rakkam A Sangma, mongsonggipa sokgipa ong·e bakko ra·angaha.
Ia tom·anio a·dokni Education Minister, tom·anio bak ra·giparangna aganprakangengon, Meghalaya a·dokko man·anio Capt Sangma-ni on·gilanggipa kamrangni bidingo gisik ra·atpilaniko on·angaha.
“Capt Sangma saksa gam-jinna mikpakma nie kamko ka·gipa ong·ja indiba ka·saani aro niksamsoani gnang a·dokna kamko ka·gipa mandesa ong·achim,” ine Sangma aganaha.
Capt Sangma-ni Meghalaya a·doko namroro silroroaniko ra·bana on·gilanggipa kamrangni gimin janapatskaengon, uni Meghalaya a·dokna aro mongsongbate Tribal-rangna on·gilanggipa kamrangni bidingo gipin jatrangba ma·sie ra·pana man·na gita Capt Sangma-ni bidingo ki·tapko sechina gita a·dokni Education Minister, Capt Williamson Memorial Govt College-ni Literature Professor-ko didiangaha.
SSLC porikkani result-o Top 10-o biming nakatgipa chatro chatrirangna skulrango ba university-rango indin admission-ko on·na gitaba Sangma ia tom·anio jinmana parakataha. Science aro Mathematics subject-rango namgipa mark-rangko man·e pass ka·gipa chatro chatrirangna ua dingtangmancha dakchakanirangko on·na gitaba ku·rachakaniko on·angaha.
Khelo India Scheme-ni ning·o dingtangmancha artificial turf robol kal·chakaniko Siju Mondal Gitok songo rikna tangka paisarangko chamataha aro ian ia jolni manderangna pattiani gita ong·aha ineba Education Minister parakataha.
Capt Sangma-ni siani salko maniani bak gita Siju Mondal Gitok kal·chakramo dingtangmancha robol kal·susaanikoba ong·atangaha aro ia kal·susaaniko Dorenggo aro Nokatgre dolni gisepo kal·susaangaha.
Indake ong·engon, ia salko Capt WA Sangma-ni atchiram Siju Mondal Gitok songoba jinma gisik ra·e maniangaha.