U·IATTIMGIPAONI
SHILLONG: Indian Constitution-ni Eighth Schedule-o napatchina dabienggipa ming 38 ku·sikrango A·chikkukode watchanggalahani gimin Garo Hills-ni bang·a manderangan suk ong·gijaniko parakattokaha.
Eighth Schedule-o napatchina dabienggipa ming 38 ku·sikrango A·chikkuko watchanggalahanina Garo Hills Autonomous District Council (GHADC)-ni Deputy CEM Nikman Ch Marak-ba suk ong·gijaniko parakatengon, ia kamko A·chik Literature Society (ALS) jako ra·china ine parakataha.
“A·chikkuko watchanggalahani gimin chinga bilongen suk ong·jaha. Ia kamko A·chik Literature Society jako ra·e kam ka·china aro chinga uamang baksa bakrimaniko on·gen,” ine Marak parakataha.
A·chikkuko Eighth Schedule-o napatchina dabianio ALS baksana dingtang dingtang dolrangba apsan ku·rang on·na nanga ine Tura Don Bosco College-ni Assistant Professor Sanggra Sangma aganskaaha.
“A·chikkuko Eighth Schedule-o napatchina dabianio ALS rakbate kamrangko ka·na nangenga aro apsan somoion dingtang dingtang dolrangba ku·rang on·na nangenga. Ia dabianio an·ching namen bilakbatna nangenga,” ine Sangma aganaha.
Chief minister aro gipin minister-rangko salantiande Garo Hills-o grongna man·ja indiba pilak dolrangan ALS baksa bakrime ku·rang on·genchimode ia dabianiko knachakchongmotgen ineba ua aganaha.
Iani bidingo ALS-ni secretary Crystal CD Marak-de mamingkoba aganna jechakskaaha aro nanggenchimode ja·mano ALS-ni gita press statement-ko on·atgen ine parakataha.
Eighth Schedule-o chapatna sienggipa ming 38 ku·sikrango A·chikkuko galchangahani gimin Tura-ni BJP MDC Bernard N Marak-ba an·tangni suk ong·gijaniko parakatengon, A·chikkuko Eighth Schedule-o napatchina dabianio ja·manchakahani a·selsa ia chang watchanggalako man·aha ine talataniko on·angaha.
A·chikkuko Eighth Schedule-o napatchina dabianiko dontongkujachina gitaba Marak didiataha.
Apsan daken, FKJGP Garo Hills Zone-ni president Pritam Marak-ba A·chikkuko Eighth Schedule-o napatchina dabianio Garo Hills gimikni dolrangko aro chatro chatrirangkoba apsan bakrimchina gita didiataha.
“A·chikkuko Eighth Schedule-o napatchina dabianio chinga pangnan bakrimaniko on·aigen,” ine ua aganaha.
Khasi ku·sikko man·chape a·song gimikni ming 38 ku·sikrangko Constitution-ni Eighth Schedule-o napatchina gita dabianirang donga ine Home Affairs Ministry-oni u·iatahachim. Indake ong·genchimoba, Home Affairs Ministry-ni u·iatgipa ming 38 ku·sikrango A·chikkukode janapskajahachim.
Ia ku·sikrangara Angika, Banjara, Bazika, Bhojpuri, Bhoti, Bhotia, Bundelkhandi, Chhattisgarhi, Dhatki, English, Garhwali (Pahari), Gondi, Gujjar/Gujjari, Ho, Kachachhi, Kamtapuri, Karbi, Khasi, Kodava (Coorg), Kokborok, Kumaoni (Pahari), Kurak, Kurmali, Lepcha, Limbu, Mizo (Lushai), Magahi, Mundari, Nagpuri, Nicobarese, Pahari (Himachali), Pali, Rajasthani, Sambalpuri/Kosali, Shaurseni (Prakrit), Siraiki, Tenyidi aro Tulu ku·sikrang ong·achim.
Eighth Schedule-o da·o dipet ming 22 ku·sikrang donga aro uarangara Assamese, Bengali, Bodo, Dogri, Gujarati, Hindi, Kannada, Kashmiri, Konkani, Maithili, Malayalam, Manipuri, Marathi, Nepali, Oriya, Punjabi, Sanskrit, Santhali, Sindhi, Tamil, Telugu aro Urdu ku·sikrang ong·skaa.
