U·IATTIMGIPAONI
SHILLONG: Meghalaya a·dokni ramarango aro mongsongbate National Highway (NH)-rango toll gate aro check gate-rangko kulipiltaiengahani gimin Meghalaya Pradesh Congress Committee (MPCC)-ni president Vincent H Pala, suk ong·gijaniko parakataha.
“Batanggimin sal somoirangode obostarang namkalangahachim indiba da·o national highway-rango aro bypass-rangoba toll gate aro check gate-rangko kulipiltaianiko nikna man·engaha,” ine Pala aganaha.
Forest check gate-rango KHADC-ni gita niam gri kajinarangko gile ra·enga ine matnangenggipani bidingo sing·anina aganchakaniko on·angengon, Sixth Schedule-ni ning·on niam dongani gimin buringo man·gipa bosturangoniko district council, kajinarangko gilenga ong·ode maming ong·ja indiba gipin bosturangonikosa kajina ra·na man·ja ine Pala parakataha.
“Ramarango km 5-prakon forest check gate-rangko done, pilak garirangonikon kajina gile ra·enga aro iade niam gita ong·jaenga,” ine ua aganaha.
Pala-ni parakatani gitade, ia check gate-rango, do·o, matchu aro ma·manti bostu salgipa garirangonikoba kajinarangko gile ra·enga.
“Uamang Assam-oni re·baenggipa garirangonikoba kajinarangko gilenga,” ine ua aganaha.
Ramarango iandake niam gri check gate-rangko chalaienggipa manderangni kosako rakgipa ja·kurangko de·china gitaba ua a·dok sorkari aro official-rangko didiataha.
Ramarango niam gri chalaienggipa check gate-rangko ra·galaha ine official-rang a·kangtokengoba da·o check gate-rangko kulipile chalaitaienga ine adita salrangna skangsan a·dokni Trinamool Congress (TMC)-ba matnangatahachim.
