U·IATTIMGIPAONI
TURA: A·songni dingtang dingtang ku·sikrangko Constitution-ni Eighth Schedule-o napatna Home Affairs Ministry-ni parakatanio A·chikkukode watchanggalani ja·man Garo Students Union (GSU) Southern Zone suk ong·gijaniko parakatenba, A·chikkukoba Eighth Schedule-o napatna gita cholrangko nipiltaichina dabiataha.
Khasi ku·sikko man·chape a·song gimikni ming 38 ku·sikrangko Eighth Schedule-o napatchina dabianirang donga ine adita salrangna skangsan ma·mongni Home Affairs Ministry parakatahachim indiba ia ming 38 ku·sikrango A·chikkuni giminde maming janapani dongjahachim ine nikna man·a.
Constitution-ni Eighth Schedule-o napatchina dabianio A·chikkukode watchanggalahani gimin suk ong·gijaniko parakatengon, “Eighth Schedule-o napatna gita Khasi ku·sikko ra·e A·chikkukode watchanggalaha ine chinga koborko man·soaha aro ian A·chikrangni kosako onchepaniko mesokani ong·aha. A·chikkuko Meghalaya a·dokosan ong·aigija a·songni dingtang dingtang bakrango aro gipin a·songrangoba jakkalani gimin Constitution-ni Eighth Schedule-o chapatako man·na krachongmota,” ine GSU SZ Baghmara-ni president Chuang Houser M Sangma parakataha.
A·chikkuko Eighth Schedule-o chapatna dabianiara Garo Hills-o songdongenggipa manderangni chengoni dabianian ong·achim ineba ua parakataha.
“Khasi-rang ku·tangko Eighth Schedule-o chapatako nangnikenga ong·ode apsan daken Garorangba ku·tangko Eighth Schedule-o napataniko nanga. Meghalaya a·dok bilsi 50 gapaniko maniaha aro A·chikkukoba Eighth Schedule-o napatgenchimode A·chikrangnaba lekka poraniko ra·anio altubatgnokchim,” ine GSU SZ-ni president parakataha.
Iani bidingo ta·raken nanga gita ja·kurangko de·china gita GSU-SZ, a·dokni Chief Minister Conrad K Sangma-koba didiataha.
