U·IATTIMGIPAONI
SHILLONG: Re·baenggipa 2024 bilsio ong·atna sienggipa Lok Sabha election-na Meghalaya a·doko dingtang dingtang political dolrang, kamrangko ka·sotokengahaon, Trinamool Congress (TMC)-de ia election-o susaani bidingo maming ku·rangko on·skakujaenga.
Kobor on·timgiparangni u·iatani gitade, re·baenggipa bilsio ong·atna sienggipa Lok Sabha election-o susaani bidingo a·dokni TMC dilgiparang, ma·mongni dilgiparango sing·sandiatanirangko dakahachim indiba da·o dipet ma·mongni TMC dilgiparang maming aganchakanirangko on·skakujaenga.
Meghalaya a·dokni Lok Sabha election-o susana nangnikenga nangnikjaenga da·o dipet ma·mongni TMC dilgiparang, a·dokni dilgiparangna maming u·iatanirangko on·kujaenga ine kobor on·timgiparang parakataha.
Ma·mongo BJP-chi dilenggipa alliance-ko ga·akatna gita Congress dolko man·chape dingtang dingtang political dolrang, I.N.D.I.A-ko bikotahani gimin ia chang Lok Sabha election-o TMC, an·tangtangan Shillong aro Tura Parliamentary seat-rango susagenma ma I.N.D.I.A alliance-ni candidate-nan chakpaaniko on·genma ukoba name ma·sikujaenga ine TMC-oni kobor on·timgiparang parakataha.
Meghalaya a·doko TMC-ko bon·atsrangahama ine sing·anina aganchakaniko on·angskaengon, Meghalaya a·doko TMC-ko dilgiparang, a·dokni general secretary baksade agangrikkuenga indiba election-o susaa susagijanikode TMC-ni national general secretary Abhishek Banerjee-sa u·iatgen ineba kobor on·timgiparang aganaha.
TMC-ni dilgiparang, media-rango ku·rang on·kuengoba, ia bilsini a·bachengachibara ong·atanggipa Assembly election-o amako man·ani ja·man TMC-ni kamrangko a·doko bang·e nikna gita man·jahachim.
Ia bilsini Meghalaya Assembly election-o TMC, dam 60 constituency-rangon susaahaoba seat dambongakosan chena man·aiahachim.
