U·IATTIMGIPAONI
SHILLONG: A·dokni 108 emergency service-ko jako ra·e chalaina gita Sonibar salo bidder ba dakkigiparang uamangni presentation-ko on·angaha.
Mni Bristibar 26 October 2023 tarikni waljatchion gimik presentation-rangna notice wate, Sonibar pringona presentation-ko on·china okamaha ine dakkigiparang aganaha.
Mitam bidder ba dakkigiparangni aganani gita, mark 30 weihtage-ni presentation-rangna minit 10 somoikosan aro minit 5 somoiko dakkigipa sakprakna on·aha.
Iani gimin dakkigiparang suk ong·gijaniko paraktokaha, maina ia project-ara Meghalaya-ni emergency service-ko bilsi bonga somoina chalani giminsa ong·a, aro iana minit 10 somoiko on·aniara bilongen komia ine agantokaha.
Dakkigiparang gimik sak 7, Sonibar salo uamangni presentation-ko on·aha. Meulance, Kubera Transport solutions, ZHL, Emergent Solutions- session-ko bakko ra·e presentation-ko on·angaha indake ong·engon Jai Ambe, Kriya & PDPL, online gita bak ra·angskaha.
“Maidake je company-ba a·dokni indita dal·a project-na minit 10 somoini gisepo project-ni gimin name dake talate on·na man·gen aro NHM, maio pangchake chegipa dakkigiparangko seokgen, ine mitamrang aganaha.”
Ia project-na namgipa aro kragipa firm ba company-ko seokja ong·ode, a·dokni manderangsan neng·nikako chagrongna gita nanggen ineba agantokaha.
Niatgenchimode India-ni 108 service-o dal·batgipa company GVK, dakkianio bak ra·jani a·sel adita sing·doanirangba nakataha.
