U·IATTIMGIPAONI
Tura: West Garo Hills-oni organisation Anti Corruption Foundation of India (ACFI), Health and Family Welfare-ni principal secretary Sampath Kumar-na chittiko seate, Kashiabari Primary Health Centre-ko ta·rake kulie on·china mol·molataha.
Kumar-na on·atgipa memo-o organisation-ni president Abdur Rup Choudhary, indine janapataha, “ia PHC-ko bilsi 15 skangan Selsella C&RD Block-ni ning·o rikahachim aro PHC-ko chalaina nanggipa chu·gimik infrastructure-rang baksa rikako ru·uta bilsi skangan matchotjok. Iarangna agreba PHC-ko chalaina staff-rangkoba ra·ahachim indiba ia PHC-na rakkigipa staff-rangko sepangjolgipa Bhaitbari PHC-ona jitatskaha.
“Jeni a·sel ia PHC-ni jurisdiction-o ga·akgipa jolni manderang aditan neng·nikako man·tokenga. Ia joloni bang·arangan kangal-cholgrirang ong·a, uni gimin ia PHC-ko kuliatahaode nambegenchim. Uni gimin chinga ia PHC-ko man·a dipet ta·rake kuliatako nangnikenga, ka·sapae ia mamlako niatpachina mol·molatenga” ine Abdur, uni seatagipa chittio janapataha.
Iarangni gisepo organisation, PHC-o gipin nangnikgipa infrastructure-ko aro ambulance-ko donchinaba dabiangaha. Memo-ko mni October 27 tariko on·aha.
