SHILLONG: Shillong Dawki Project-na ge-1 package-o ramako ta-riangna chu·gimik jako ra·angaha iako December ja bijangchioni a·bacheng-naba donga.
A·bachengani tarikko chu·sokatna am·enggipa agency-na aganataha aro antini gisepo NHIDCL headquaters-oni official chittiko nakatatgen ine Official-rang u·iataha.
Tarikko parakatani ja·man contractor kamko a·bachengatna mandni bil aro machine-rangchi ka·angna man·ako niangna sal 20-25 somoiko jakkalanggen ine u·iataha.
Barik Point-ona flyover-ko tariangna chanchianir-ang dongama dongja ine sing·anina, u·iataha, ian agreement-osa pang-chakaigen, flyover-ko Anjale point-nasan cha-nangaha aro Barik point-ona flyover-ko tariangna maming official-ni gita sea jotachi lekka on·a dongja.
Project-na gipin package-ni giminba sing·anina indake u·iataha, project-ni package II-ko contractor seokaha aro agreement-o ta·raken soi ka·anggen.
Project-ni package IV-na galgiparang da·onaba bangbang ong·e dongkuenga.
Rilbong biapni sepang jolo bang·dame a·arangko galani bidingo sing·anina indake u·iataha. contracto ka·donganiko on·angaha jeon kam ka·angna kakketgipa somoi ong·jaenga aro NHIDCL-ni ramao niamgri galanganni kosako ja·ku de·angna DC aro SP-na NHIDCL seachi u·iataha.
Project-ni package 1-gipao kam ka·anganiko COVID-ni somoio a·bachengatahachim indiba adita somoirangna kam ka·ani ja·man skanggipa contractor ong·gipa watgale galangaha.
Shillong-oni Upper Shillong-ona four-lane rama Shillong-Dawki Road project-na JICA-ni bako tangka paisa chamatgipa ong·a. Da·o garirang re·na ramako a·palbatatna man·gija dongaienga.
Road project gimikko ge-5 package-rangona sualataha jekon ge-3 package-rangko kam ka·ako skang contractor ong·gipa watgalani ja·man kuligija dongkuaienga. Project-ko Meghalaya-ni High Court-chi nirokangenga.
