U·IATTIMGIPAONI
SHILLONG: Block-II-ni ning·o donggipa dam 22 songrangko Assam-oniko Meghalaya a·dokona man·bapilna ka·dongenga ine Nongpoh-ni UDP MLA aro Ri Bhoi Regional Committee-ni membor Mayralborn Syiem parakataha.
“Ia songrangko Meghalaya a·dokona apjitbapilgen ine chinga 100 percent ong·en ka·dongenga aro iana chinga rakbee kamrangko ka·enga. Iako chinga media-ni mikkangosan aganenga ong·ja indiba kamrangkoba ka·enga,” ine a·dok damgnini gisepo so·sojengjeng ong·enggipa Block-II jolrangni gimin Syiem aganaha.
Nongpoh MLA-ni parakatani gitade, Raid Nongtung-o donggipa dam 18 songrang baksana dambri songrangba dongkuenga ine songko nokko dilgiparang aganahani gimin Meghalaya a·dokona ra·bapilna nangenggipa gimik dam 22 songrang donga.
“Ia jolrango donggipa manderang bano ong·na sikenga aro ia jolrangni itihasni bidingo re·ange am·sandianirangko dakna skangba chinga name koborrangko ra·chengna nanggen. Ia jolrango songdongenggipa manderangko chinga gimaatna sikja aro anga ka·donga ia biaprangko Meghalaya a·dokona man·bapilchongmotgen,” ine Syiem aganaha.
Ia songrangko maikai Meghalaya a·dokona man·bapilgen ine ua ka·dongenga ine sing·on, “Ian chingni ka·donganisa ong·enga. Ia jolrango songdongenggipa manderang baksa chanchirimani ja·man aro regional committee-ni report-ko on·ani ja·man a·dok damgnini chief minister-rang, iani bidingo chanchie ja·ku de·anggen,” ine Nongpoh MLA parakataha.
Gnigipa bako namatna nangenggipa damdok jolrangoni dambride Ri Bhoi a·jaon ong·enga aro uarangara Desh Domrea, Block-II, Borduar aro Nongwah Mawtammur jolrang ong·engachim.
