U·IATTIMGIPAONI
TURA: West Garo Hills a·jani Gambegre C&RD Block ning·o donggipa Chenggapara songo skanggipa changna 30 Drums Wangala Festival ba Dama bol 30-ko doke Wangala manianiko re·baenggipa November 11 tariko ong·atenga.
Iani bidingo u·iataniko on·atengon, ia 30 Drums Wangala manianiko chu·sokgipa ong·atna gita Gambegre constituency-ni ning·o donggipa pilak manderangkon bakrime kam ka·china 30 Drums Wangala Festival Committee-ni general secretary Bostone M Sangma didiataha.
“Ia 30 Drums Wangala manianiko ong·atani miksonganiara A·chikrangni daka rikani aro chrok mesaanirangko ripinge rakkina ong·enga. Bang·bata songrangon A·chikrangni Wangalani gimaroroangengahani gimin A·chikrangni ia gamchatbegipa daka rikaniko mikkangchi dedrang su·drangrangnaba mesokna man·na gitasa chinga ia Wangala manianiko ong·atenga,” ine Sangma parakataha.
Ia 30 Drums Wangala manianiona re·bae bakko ra·echina gitaba 30 Drums Wangala Festival Committee-ni general secretary didiataha.
Ia Wangala manianiko November 11 tarik pring 10:00 bajioni Chenggapara kal·chakramo ong·atenga ineba ua u·iataha.