U·IATTIMGIPAONI
SHILLONG: Meghalaya a·doko niam gri chalaienggipa toll gate-rangni bidingo adita salrangna skang, United Democratic Party (UDP) aro National People’s Party (NPP)-ni gisepo nanggrikangani ja·man, niam gri chalaienggipa toll gate-rangko bon·atna gita sorkari gisiko nangen kamko ka·enga ine Nongpoh-ni UDP MLA Mayralborn Syiem parakatskaaha.
Syiem-ni parakatani gitade, ramarango toll gate-rangko niam gri kulienba garirangoniko tangka gile ra·na man·jana gita sorkari kamrangko ka·engachim.
“Batanggimin adita jarangnade toll gate-rangko chalaiengachim indiba da·o ia pilak toll gate-rangkon chiptokaha. Police aro district administration pangnan mikrake kamrangko ka·enga aro sorkariba niam gri chalaienggipa toll gate-rangko chipna gita rakbee kamrangko ka·enga,” ine Syiem aganaha.
Ramarango toll gate-rangko kulie garirangoniko kajina gilengani a·selan ma·manti bosturangni damrang tang·doenga ineba Nongpoh MLA parakataha.
“Bostu salgipa truck garirangonikon tangka paisa gile ra·enga ong·ode bostuni damrangba tang·doangtelaigen aro ian namgipa bewal ong·ja,” ine ua aganaha.
Ramarango chalaienggipa toll gate-rangko sorkari chipatani ja·man da·o toll gate aro check gate-rangko kulitaiengaha ine adita salrangna skangsan, a·dokni Trinamool Congress (TMC) parakatahachim ine nikna man·a.
“A·doko niam gri chalaienggipa toll gate-rangko chipattokahachim indiba mitam manderang, iandakgipa check gate-rangko kulipiltaiaha,” ine TMC-ni vice president George B Lyngdoh aganahachim.
Meghalaya a·dokni ramarango aro mongsongbate National Highway (NH)-rango toll gate aro check gate-rangko kulipiltaiengahani gimin Meghalaya Pradesh Congress Committee (MPCC)-ni president Vincent H Pala-ba adita salrangna skangsan suk ong·gijaniko parakatahachim.
“Batanggimin sal somoirangode obostarang namkalangahachim indiba da·o national highway-rango aro bypass-rangoba toll gate aro check gate-rangko kulipiltaianiko nikna man·engaha,” ine Pala aganahachim.
Forest check gate-rango KHADC-ni gita niam gri kajinarangko gile ra·enga ine matnangenggipani bidingo sing·anina aganchakaniko on·angengon, Sixth Schedule-ni ning·on niam dongani gimin buringo man·gipa bosturangoniko district council, kajinarangko gilenga ong·ode maming ong·ja indiba gipin bosturangonikosa kajina ra·na man·ja ine Pala parakataha.
“Ramarango km 5-prakon forest check gate-rangko done, pilak garirangonikon kajina gile ra·enga aro iade niam gita ong·jaenga,” ine ua aganaha.
