U·IATTIMGIPAONI
TURA: Garo Hills-oba rasinni dam rang·san tang·doangahani a·sel manderang neng·nikanirangko man·na a·bachengtokaha.
Robibar salo, Tura-o songdongenggipa mande saksani parakatani gitade, re·anggipa antiosan ua rasinko kg-prako gong 50 ka·e breahachim indiba ia antide rasinko kg-prako gong 80 ka·e palskaahachim.
“Antisani gisepon rasinni damko gong 30 bariate, da·o gong 80 palskaenga aro chingna aganani gitade, haida mikkang antirangode rasinko kg-prako gong 100 ka·e palnaba gnang,” ine ua aganaha.
Iani bidingo me·su palgiparango sing·sandiaton, uamang wholesaler-rangoniko kg-prako gong 70 ka·e brebaskana nangengani a·sel rasinko gong 80 ka·e palna nangskaenga ine kobor on·ataha.
Koborko on·ani gitade, wholesaler-rang rasinko Bengaluru, Nasik, Patna aro Rajasthan a·dokrangonikosa ra·baenga aro ia a·dokrangoba rasinni damko adita salrangna skangsan bariatahachim.
“Rasinni dam quintal-prako gong 4000-rang gapaha aro December jaona kingkingde komipilani cholrang dongjaenga,” ine kobor on·timgiparang parakataha.
