U·IATTIMGIPAONI
SHILLONG: Meghalaya a·doko Accredited Social Health Activists (ASHA)-rangna jaanti on·enggipa dormahako bariatchina dabianiko a·dok sorkari knachakjaengani gimin kamrangko dontongatna tik ka·angaha.
Sombar salo, Meghalaya ASHA Workers Union-ni dilgiparang, a·dokni Health Minister Ampareen Lyngdoh-ko gronge agangrikangani ja·man, Sombar saloni a·bachenge November 6 tarikona kamrangko dontongchengna tik ka·angaha.
Health Minister-ko grongeani ja·man kobor ra·timgiparangna talataniko on·angengon, ASHA worker-rangni man·gniko japrako gong 2000/-ona bariatchina, indin sanna banani cholrangko on·china ba MHIS ba ugita dakgipa scheme-ni namgnirangko on·skachina uamang Minister-ko didiangaha ine Union-ni adviser Sony Kharjana parakataha.
Indake ong·engon, ASHA worker-rangni dabienggipani bidingo a·dokni Health Minister, nangchakegipa department-rang baksa agangrikna ku·rachakaniko on·ataha ineba Kharjana parakataha.
“Chingni dormaharangko bariatani giminde ua maming ku·rachakaniko on·jaha indiba November 6 tariko a·dokni Chief Minister Conrad K Sangma-ko gronge iani bidingo agangriknasa ua ku·rachakaniko on·atahani gimin chinga Sombar saloni a·bachenge November 6 tarikona kamtangtangko dontongatchengna tik ka·aha,” ine ASHA worker-rangni adviser parakataha.
November-ni 6 tariko a·dokni Chief Minister aro Health Minister maiko chanchia uno pangchake, ASHA worker-rang ja·mano nanga gita ja·kurangko de·anggen ineba ua aganaha.