U·IATTIMGIPAONI
TURA: East Garo Hills a·jani Dobu primary health centre (PHC)-o ASHA-rangni man·gnirangko aro ma·giparangna bi·sa an·pakani ja·man on·gipa JSY scheme-ni tangka paisarangko on·jaenga ine social activist saksa Tambu Sangma matnangataha.
Sangma-ni parakatani gitade, uni RTI ka·e am·sandianio, ASHA-rangni man·gnirangko aro ma·giparangna bi·sa an·pakani ja·man on·gipa JSY-ni tangka paisarangko somoi gitan on·enga ine District Medical & Health Officer (DM&HO) a·kangatahaoba, ia man·gnirangko 2015 bilsionin man·tokkujaenga ine ASHA-rang aro ma·giparang aganskaahachim.
“Iani bidingo anga ASHA-rangko aro JSY scheme-ni namgniko man·na nanggipa ma·giparango sing·sandion uamang 2015 bilsionin man·tokkujaenga ine aganaha. JSY scheme-ara hospital ba PHC-rango bi·sa an·pakani ja·man ma·giparangna tangka paisarangko on·e dakchakna ma·mong sorkarini a·bachengatgipa scheme ong·achim aro apsan daken ASHA-rangnaba uamangni simsak nirokanirangna tangka paisarangko on·na nangachim,” ine East Garo Hills a·jani social activist Tambu Sangma parakataha.
Sangma-ni parakatani gitade, ASHA worker-rango sing·sandie nion, uamangba ia scheme-ni tangka paisarangko man·kujaenga ine ma·sina man·ahachim.
“Angni RTI ka·e am·sandion, ASHA worker-rangna aro bi·sa an·pakgipa ma·giparangna tangka paisarangko gamaha ine Williamnagar DMHO office-oni aganchakaniko on·aha indiba iani bidingo ASHA-rango sing·sandion, uamangoni darangba ia scheme-ni namgnirangko man·na dongkuja inesa aganchaktokaha,” ine Sangma parakataha.