U·IATTIMGIPAONI
TURA: Adita salrangna skang, North Eastern Hill University (NEHU) Tura Campus-o chatro saksako kragija dake ‘ragging’ ka·ani gimin mikkangchi NEHU campus ning·o ong·enga obostarangko nambate nirok sandichina gita Tura-ni social activist saksa Cherian Momin, NEHU-ni Vice Chancellor (VC) PS Shukla-ko didiataha.
NEHU Tura campus-ni hostel damsao iandake gipin biaponi re·bae poraienggipa chatro saksako kragija dake kal·ake roaniara chatro chatrirangna kraatchana nanganiko ra·baan baksana chatro chatrirangni naljokaninaba jajrengna nanganiko mesokani ong·aha ine janapatengon, college-rango iandake ‘ragging’ ka·ani ba kal·ake roaniko 2019 bilsion Supreme Court champengatmanahani gimin NEHU campus-oba iandakgipa kamrangko mikrakbate nirok sandina nanga ine Momin parakataha.
University-ni dingtang dingtang department, hostel-rang aro gipin biaprangoba iandake kal·ake roanirangko champengna gita nambate nirok sandianirangko dakchina didiatengon, NEHU-o anti-ragging committee aro anti-ragging squad-ko songan baksana department-tangtangni gitaba apsan daken simsak nirokanirangko on·na nanga ine Momin parakataha.
Koborko on·ani gitade, ia a·sel ong·ani re·anggipa October 8 tarik walo, Chasingre-o donggipa NEHU Tura Campus-ni Arbella Boys’ Hostel-o ong·ahachim aro ua somoio chatro saksako, adita sak manderang, uni kuturioniko okamatenba, andalgipa kuturi ge·saona rimange, uni ba·ra cholarangko okmilongate jinmani mikkango chrokate roahachim. Ia manderang, ia chatroni kosako ka·mikkenatanirangkoba dakahachim.
Ia a·selni bidingo chatro chatrirang, NEHU-ni proctor Dr Gino A Sangma-na badi ka·e sedoatenba, campus-ni gita ning·in ning·in sandirokatani ja·mansa iani bidingo ma·sina man·ahachim.
