U·IATTIMGIPAONI
TURA: Meghalaya a·dokni dingtang dingtang hospital-rango dingtang dingtang kamrangko contract basis-o kam ka·enggipa sak 157 manderangna jadokni dormaharangko matchote on·gija kam bon·attokaha ine kobor on·aha.
Koborko on·ani gitade, ia manderangko COVID-19 sajinmani somoio Health department, dingtang dingtang kamrango rakkiahachim indiba uamangna jadokni dormaharangko matchote on·gija da·o sorkari, uamangni kamrangko bon·ataha.
Ia sak 157 manderangoni mitamde lab technician, blood bank operator aro emergency-ni kamrangko ka·na gita COVID sajinmani somoio rakkiako man·ahachim.
Indake ong·genchimoba, ia manderangni kamko Health department, ra·dodapatna chol ong·jae re·anggipa September jaonin kamko bon·atna nangao ga·akaha ine kobor on·timgiparang parakataha.
A·dokni dingtang dingtang hospital-rango contract-na kam ka·enggipa sak 157 manderangko kam bon·atahani a·sel ia hospital-rangko kamrangko ka·anio da·o neng·nikanirangko man·skana nangengaha ineba kobor on·timgiparang parakataha.
“COVID sajinmani somoirango aro uni ja·manba emergency aro laboratory-rangko salo konta 24 chalaiachim indiba da·ode kam ka·giparang chu·ongjahani gimin konta 12-ona komiatna nangaha,” ine kobor on·timgiparang aganaha.
Ia sak 157 kam ka·giparangna jadokni dormaharangko matchote on·gija kam bon·atahani giminba mitam kam ka·giparang suk ong·gijaniko parakattokaha.
Iani bidingo re·anggipa antiosan a·dokni Chief Minister Conrad K Sangma-na sedoatahachim indiba da·alonan maming aganchakanirangko man·kujaenga ineba kobor on·timgiparang parakataha.
Kam bon·ata man·gipa sak 157 manderangoni sak 22-de Shillong Civil Hospital-o, sak 11-de Tura Civil Hospital, sak 3-de Ampati Civil Hospital aro gipinrangde dingtang dingtang CHC aro civil hospital-rango kam ka·giparang ong·achim ine ma·sina man·aha.
