U·IATTIMGIPAONI
SHILLONG: North Eastern Hill University (NEHU)-ni ning·o donggipa NEHUTA, NEHUSU aro NEHUNSA dolrangni dabianirangko knachakjaengani gimin NEHU-ni Vice Chancellor (VC) Prabha Shankar Shukla-ko jegale, ia dolgittamni nangrime bikotgipa Joint Action Committee (JAC), Mongolbar salo Academic Council-ni chang 111-gipa tom·aniko ong·atanio bak ra·gija, uamangni jingjengataniko a·bachengataha.
JAC-ni membor-rang skanggipa, Academic Council-ni tom·aniko ong·atna sienggipa Multi Use Convocation Hall-o tom·chengaha indiba Academic Council-ni tom·aniko NEHU-ni VC, an·tangni office-o donggipa conference hall-ona apjitangskaaha ine knasoani ja·man JAC-ni membor-rang, ia biaponi jinma re·jomangaha.
VC-ni office-o tom·chimongani ja·man JAC-ni membor-rang VC-ni office-ona napdraangenba, Academic Council-ni tom·anio bak ra·na re·anggipa an·tangtangni membor-rangko ong·katchina aganeaha.
Membor-rangoni bang·batan uamangni agananiko knachakaha indiba professor-rangoni saksa uamang baksa re·angpana jechakon, JAC-ni membor-rang, uni kosakoba jegalanirangko dakangaha.
Iani ja·man JAC-ni tom·aniko ong·atangenba, VC-ni ong·gija dakgipa kamrangko JAC-ni dilgiparang, jinmana agan-talate on·angaha.
‘Niam gri’ kamo rakkiako man·gipa contractual technical officer/senior consultant Rohit Prasad-ko October 26 tarik waljatchini gisepon kamoniko ra·galpilchina dabianiko chu·sokatjahani gimin JAC-ni membor-rang, VC-ni kosako jingjengatanirangko dakna a·bachengataha.
JAC-ni chairman Lakhon Kma-ni parakatani gitade, ‘niam gri’ kamo rakkiako man·gipa Rohit Prasad-ko kamoniko ra·galpilchina dabianiko aro ia dolgittamni dingtang dingtang dabianirangko NEHU-ni VC knachakna gita gisiko nangjahachim.
‘Niam gri’ kamo rakkia man·gipa official-ko kamoniko ra·galpilan baksana statutory officer-rangko, university engineer-ko aro CDC-ni director-ko ta·raken songchina gita JAC dabiahachim ineba Kma aganaha.
