U·IATTIMGIPAONI
TURA: October-ni 30 aro 31 tarikrango, A·chik Holistic Awakening Movement (AHAM) Gasuapara unit-ni gita pekatgipa samrangko jakkalani namgijani, bilsi sokgijani bia ka·ani aro samtangtango ong·telaigiparangko ripinge rakkiani bidingo chadamberangna agan-talataniko on·na gita awareness program-ko ong·atangaha.
Ia awareness program-ko ong·atanio District Social Welfare Officer SS Koch, District Child Protection Officer Abeeda G Momin, Maternity & Child Health Officer Dr Rikrak Ch Marak aro Gasuapara Health Centre-ni Dr Bishardame Suchiang, pekatgipa sam aro churangko jakkalani namgijani, bilsi sokgija bia ka·ani aro samtangtango ong·telaigiparang, jekai buring bolgrim aro do·o-matrangko ripingna nangengani gimin jolni chadamberangna agan-talate on·angaha.
AHAM Gasuapara unit-ni parakatani gitade, ia sal somoirango chadamberangni gisepo pekatgipa samrang aro churangko jakkalanirang batroroengani gimin skulrango poraienggipa chatro chatrirangna mikraksamsoataniko on·na ia program-ko ong·ataha.
Me·chikrangko bilsi sokgijani bia ka·atanichi me·chik bi·sarangni janggi tangani nosto ka·ako man·engani gimin aro samtangtango ong·telaigipa bol wa·arang, do·o matrang aro matburingrangba gimaroroangengahani giminba chatro chatrirangna iarangni bidingo mikrakataniko on·na gita ia awareness program-ko ong·ataha.
