U·IATTIMGIPAONI
Shillong: A·doko ong·gija kam ka·giparangko aro tangka dabie ra·ani jak donggiparangko police rim·aha ine Deputy Chief Minister, Prestone Tynsong Butbaro aganaha.
Mijal Shillongo kobor ra·timgiparangna aganengon, rim·ako man·giparang doloni, giljarangni doloni, ba gittimoniba ong·chong maming katta dongja, dosi dakgipade niamni ning·on ga·akaigen, Tynsong aganaha.
Pressure group-rangni bimingo tangkarangko dabie ra·engode uandakgipa manderangni kosako maiko agangen, Deputy Chief Minister aganaha.
Daito gnanggipa pressure group-rang talattokaichina ineba ua aganaha.
Indake ong·engengon, Tynsong indakeba aganaha je darangba niamni kosako ong·jani gimin manderang je doloniba ong·bo sima arina batna nangja.
A·dokni je biapoba ong·chong, ra·seke ba dabie ra·giparangko champengna gita police, uamangni kamko ka·enga ineba Deputy Chief Minister aganaha.