U·IATTIMGIPAONI
TURA: Ia bilsio Tura Diocese-ni Golden Jubilee ba bilsi 50 gapaniko re·baenggipa November 4 aro 5 tarikrango manina siengani gimin ia chang Tura-ni Roman Catholic (RC) Road ba Bishop House-o donggipa Catholic gopramode All Souls Day-ko November-ni 1 tarik Budbar salo maniangskaaha.
November-ni 1 tariko pangna bilsian Catholic bebera·giparang All Saints Day-ko manie, November-ni 2 tarikosa All Souls Day-ko manirongachim indiba ia bilside Tura Diocese-ni Golden Jubilee-ko manina tarisamsoengani gimin All Souls Day-ko salsa skang manina nangao ga·akaha ine Tura Diocese-ni dilgiparang u·iataha.
“Tura-ni RC Road ba Bishop House-o donggipa gopramosan All Souls Day-ko November-ni 1 tariko maniaha indiba Catholic Mondolini Rongkhon Songgital-o donggipa gopramko man·chape pilak gipin parish-rangon ia salko November-ni 2 tariko manianggen,” ine Tura Diocese-ni dilgiparang talataniko on·ataha.
Tura-ni Bishop House gopramo All Souls Day-ko maniengon, bang·bea Catholic bebera·giparang bakko ra·angtokenba, sigiminrangni janggina bi·chakanirangko dakan baksana mombatirangko so·e aro nitobegipa pulrangko uamangni gopramrango done uamangna gisik ra·aniko dakangaha.
Ia gopram manianio Tura Parish-ni pamongrang tom·aniko dilangaha aro sigiminrangna bi·chakangaha. Ia salo Catholic pamongrang namgipa kattarangko aganangengon, bi·anichi pilakkon chu·sokatna man·a aro ian sakantini janggi tanganina nangchongmotgipa ong·a ine aganaha. Sianggiminrangna bi·chakanirangara uamangna tom·tomaniko ra·baanisan ong·aija indiba ning·tubatgipa tom·tomaniko uamangna bi·anichi donangna man·a ineba pamongrang aganaha.