U·IATTIMGIPAONI
SHILLONG: Shillong, Jowai aro Tura-o donggipa District Hospital-rango kam ka·anirangko nirokna gita a·dok sorkari, dingtangmancha officer sakgniko songaha.
Adita salrangna skang, Meghalaya a·dokni Health Minister Ampareen Lyngdoh, Shillong Civil Hospital-ona re·angenba obostarangko niangani ja·man Bristibar salo ua, civil hospital-rango nanganirangko nipiltaina gita health officer-rang baksa tom·aniko ong·atangaha.
Health officer-rang baksa tom·e chanchirimani ja·man kobor ra·timgipa manderang baksa agangrikengon, Shillong Civil Hospital aro Jowai Civil Hospital-o kam ka·ani aro dingtang dingtang nanganirangko nirokna gita Health & Family Welfare department-ni Commissioner & Secretary Dr Joram Beda-ko aro Tura Civil Hospital-ko nirokna gita Health department-ni Secretary Ramkumar S-ko songe donangaha ine Lyngdoh parakataha.
Health Minister-ni parakatani gitade, ia officer-rang, komibeoba jao changgni dake, hospital-o kam ka·giparangko aro nanganirangko nirokjringgen.
Ia damgittam hospital-ni medical superintendent-rangkoba, sorkarini kamrango bakrimchina aro IPHS-ni niamrang baksana National Quality Standard-ko chu·sokatanio kamrangko name nirokchina gita Health Minister didiataha.