U·IATTIMGIPAONI
SHILLONG: North Eastern Hill University (NEHU)-ni Vice Chancellor Prabha Shankar Shukla-ko NEHUTA, NEHUNSA aro NEHUSU dolrangni nangrime bikotgipa Joint Action Committee (JAC), media-ni mikkango jera ra·grikna ra·biatenba, Rohit Prasad-ko niam gitasa senior consultant/technical officer songaha ine uni a·kangenggipani chu·gimik lekkarangko mesokchina didiataha.
“Vice Chancellor-ni media-rangna aganani gitade uni Rohit Prasad-ko senior consultant/technical officer songaniara niam gitasa ong·aha. Indide ua an·tangni a·kangani sakkirangko chingna mesokchina aro iani bidingo ching baksa jera ra·echina,” ine JAC-ni chairman Lakhon Kma ra·biataha.
November 3 tarik attamni 3:30 bajimango uamang, VC-ni office mikkango jinma tom·aniko ong·ate uamangni jingjengataniko bilakdapatangkugen ineba Kma parakataha.
“October-ni 31 tariko chingni tom·bimonganiko ong·atanio chinga, November 3 tarik attamni 3:30 bajio, VC-ni office mikkango tom·bimonge chingni jingjengataniko bilakbatatna tik ka·aha,” ine ua aganaha.
JAC chairman-ni parakatani gitade, niam gri kamo songako man·gipa senior consultant/technical officer-na November 3 tarikni gisepon kam ra·galpilani chittiko on·china didina gita VC-ni kosako uamangni jingjengataniko bilakbatatna JAC tik ka·aha.
Rohit Prasad-ko niam gri kamo ra·ahani gimin JAC rakbee jegalanirangko dakengon, una chakpaanirangko on·skaengani giminba Kma, NEHU-ni VC-ko sing·doataha.
“NEHUTA, NEHUNSA aro NEHUSU dolrang da·o JAC-ni ning·o apsan ja·kurangko de·engahani gimin batanggimin somoirango ia dolgittamni dingtang dingtang dabianirangkoba da·o JAC-ni ning·on jako ra·na gitaba JAC-ni tom·anio chanchirime tik ka·angaha,” JAC-ni chairman parakataha.