U·IATTIMGIPAONI
SHILLONG: District-o niamgri koelarangko bikotengkua ine matnanganirang nakatengani gimin, koelani mamlarangko sandi-nirokenba a·dok sorkarina report on·china gita donako man·gipa saksani inquiry committee, jekon Justice (retd) B P Katakey dakengachim, ua East Jaintia Hills district-ona ru·utgijan re·ange niegen.
Mijalo koborna ku·baltiengon, East Jaintia Hills-o da·oba niamgri koelarangko bikotenga ingipa koborrangko ua man·soaha, jekon nie-nike ra·na gita ua bakan re·anggen ine Justice (retd) B P Katakey aganaha.
Indake ong·genchimoba, batanggimin ja last 3-4 ni gisepode a·dokni darang biaponikoba, niamgri koela bikotani koborrangko man·sojahachim ineba ua aganaha.
Unaskango, Shallang Police Station-ni OC-ni kosako department-ni gita kam ka·enba administrative-ni gita bichal ka·aniko dakchina Justice Katakey de·e mesokahachim, unigisepon A·dok Sorkarini re·anggipa jao parakani gitade Shallang PS-ni OC-ni kosako department-ni gita ja·ku de·engaha.
Re·anggipa somoio, Shallangona wenangmiting somoio, niamgri koelarangko bikote Shallang Police Station-oni Km 1 mang chel·aon dane dondamako Justice Katakey nikeahachim.
Justice Katakey, da·o dipet ming 18 report-rangko Meghalaya High Court-o file ka·aha aro koela bikotani mamlarangni bidingo ua re·baenggipa November 8 tariko Shillong-o tom·aniko dakanggen.
Shallang area-o niamgri chalaigipa coke factory-rangni bidingo aganengon, permission man·e chalaigipa ge 3-4 factory-rangna agrede niamgri chalaigipa coke factory gimikkon chipattokaha ineba parakaha.
Coke factory-rangko pe·e galani bidingo Supreme Court, stay order-ko on·genchimoba, ia area-o gipin coke factory-rang dongdapjana gita Committee nirokenga.