U·IATTIMGIPAONI
SHILLONG: Garo-Khasi ku·sikrangko 8th scheduled-o napatna kam ka·anirangni bidingo MPCC chief aro Shillong MP, Vincent H Pala-ni matnange agananirangna aro politics kal·na chanchianina NPP, uni kosako matnangbikpilaha.
“Chinga Garo-Khasi ku·sikrangko 8th scheduled-o napatna kam ka·anio maming politics kal·ani dongja, ia minggni ku·sikrangko 8th scheduled-o napatna da·omitingo somoi namchachagipa ong·enga. Palani agananiara, uni political-ni gita man·dapna rikanisan ong·aia,” NPP spokesperson aro KHADC MDC, Bajop Pyngrope aganaha.
Constitution-ni eight scheduled-o Khasi ku·sikko napatna gita kamgri ku·suk mangmangchisan ka·aia ine Pala, a·doko sason ka·enggipa NPP aro BJP-ko matnangahachim.
‘‘Congress-ni sason ka·mitingon iaku chu·sokatna man·jaha, unigimin da·o iana matnange roe orto dongja. Uamang da·o sasonni bilo ong·ja, unigimin matnange roani orto dongja,” Pyngrope aganaha.
Da·o Lok Sabha election-rang sepangbaengahani gipin, political party-rangoni matnangani kattarangde sokbaaigen ineba ua agandapaha.
Ua indakeba aganaha je “Sorkari, an·tangni bil ama kakket jotton ka·aha aro Chief Minister an·tangba India sorkariko gisik nangatna gita raken kam ka·aha, chinga ka·donga India sorkari chingko knachakgen.’’
“Khasi ku·siknasan ong·aija, ILP-naba resolution pass ka·aha, jerangnan India Sorkarini aganchakaniko sengenga,” Pyngrope agandapaha.