U·IATTIMGIPAONI
TURA: Garo Hills-ni dambonga a·jarango donggipa block office-rangko nieani ja·man, manderangni namgnina ia block office-rango kam ka·ani bewalrangko namdapatna gita Tura-ni BJP MDC Bernard N Marak, dambonga a·jani deputy commissioner-rangna sedoataha.
“Skanggipao, angni block office-rangko nieanio, block office-rang aro VEC-rang darangba niamo pangchake Permanent Waitlist-ko donjani a·sel manderangni gisepo ma·sisretanirang bang·en ong·enga ine anga nikna man·aha. Permanent Waitlist-rangko donjani a·sel, block office-rango agent dake kam ka·enggipa manderang, indin on·enggipa scheme-rangna songni manderangoniko tangka paisarangko gile ra·enga. Uni gimin block-rango aro songrango ta·raken Permanent Waitlist-rangko donchina chinga nangnikenga,” ine Marak janapatenba, iako uamang antisani gisepon nipilanggen ine parakataha.
Block office-rango kam ka·enggipa manderang chu·ongjaenga ine janapatengon, gram sevak-rang dongjani a·selan mitam biaprangode gram sevika-rangsa gram sevak-rangni kamko ka·skana nangenga ine Marak, suk ong·gijaniko parakataha.
RGSA, DDU GKY staff-rangna dormaharangko on·jaenga ine janapatskaengon, iani bidingo ta·raken ja·kurangko de·china Tura MDC, dingtang dingtang DC-rangko didiataha.
“Gittamgipao, MGNREGA-ni hajirarangkoba bang·bata biaprangon matchote on·kuja aro bang·a VEC-rangon online gita upload ka·anio hajirarangko man·rikjaha. Mobile network man·gijagipa songrangkoba sandie, ia songrango mobile network-rangko on·na ta·raken kamko ka·na nanga. Badiaba badiaba VEC-rango me·chikrangko dilna on·jaenga ine badi ka·anirangkoba nikna man·aha, uni gimin me·chikrangnaba apsan cholko on·na nanga aro VEC-rangni nanganirangko ta·raken chu·sokatna nangchongmota,” ine Marak parakataha.
Badiaba badiaba songrango Aadhar-ko manderang ‘666’ ine ma·sisrettokenga aro badiaba biaprangode bank-rangan beneficiary-rangni bank account-rangko Aadhar baksa link ka·e on·jaengani a·sel Aadhar gita tangka paisarangko on·anio neng·nikanirangko chagrongna nangenga ineba Tura MDC parakataha.
Ma·mong sorkarini ra·gatgipa scheme-rangara joltangni MLA-rang baksa maming nangchakeani dongja ine talataniko on·angskaengon, ma·mong sorkarini scheme-rangko ra·gatengmiting somoio MLA aro uamangni agent-rangni jak on·aniko champengna nanga ine Marak parakataha.
VEC secretary aro gram sevak-rang, ma·mongni scheme-na dongimin niam gitasa kamko ka·na nanga aro je manderangan, sorkarini indin on·enggipa scheme-ko ra·na gita tangka paisarangko dabiengachim, uandakgipa official-rangni kosako rakgipa ja·kurangko de·na nanga ineba Marak didiataha.