U·IATTIMGIPAONI
SHILLONG: NH 40E aro gital NH 206-ni km 16 ong·gipa Dawki-Amlarem-Jowai ramako name tarija ine matnangenba, HYC War Jaintia circle aro dingtang dingtang dolrangni nangrime bikotgipa Joint Action Committee (JAC), ia ramako tarigipa Dhar Constructions-ni kosako kacharina badi ka·dona gita ka·mikkenataniko on·angaha.
Dhar Constructions-ni kosako ja·kuko de·na mikrakatengon, “Chinga ia company-o ka·dongna man·jaha. Ia company-ni kosako PIL ka·na gita chinga mikkang antio apsan tom·e chanchirimanggen,” ine JAC-ni dilgiparang parakataha.
JAC-ni membor aro HYC-ni president Yoodahunki Shylla-ni parakatani gitade, Nongtalang-oni Dawki-ona dakanggipa km 16-ni ramani bidingo RTI ka·e am·sandion, ia ramana gong kror 43.69-na baten tangka paisarangko chamahachim ine ma·sina man·aha.
“Ia National Highway ramani km 16 ong·gipa bakko tariaoni jagnini gisepon nosto ong·pilaha. Uni giminsa chinga iani bidingo RTI-ko ka·e am·sandiaha,” ine Shylla aganaha.