U·IATTIMGIPAONI
SHILLONG: Meghalaya Legislative Assembly-o dingtangmancha a·dokni MLA-rangna ku·sikni bidingo orientation program-ko ong·atgen aro ia program-o Garo Hills-ni MLA-rangna Khasi ku·sikni gimin skie on·enba Khasi-Jaintia Hills-ni MLA-rangna Garo ku·sikni gimin skie on·skagen ine Sonibar salo, a·dokni Chief Minister Conrad K Sangma parakataha.
Ia program-ko ong·atani bidingo talate on·angengon, a·doko jakkalgipa ku·sikrangko nambatatna aro dilgiparangkoba saksa sakgipinoniko skie ra·grikchina miksonganio ia orientation program-ko ong·atenga ine Chief Minister parakataha.
Sonibar salo, Babu Hajom Kissor Sing-ni siani salko maniani bak gita Unitarian Union Eastern India-ni Babu Hajom Kissor Sing Memorial Lecture-ko Shillong songjinmani U Soso Tham Auditorium-o ong·atanio iako Chief Minister aganaha.
A·doko jakkalenggipa mongsonggipa ku·sikrangko, dingtang dingtang porikkarango mongsonggipa subject dake a·bachengatengaha ineba Chief Minister parakataha.
“An·chingni ku·sikrangko Eighth Schedule-o napataniko an·ching senge dongengon, a·doko dingtang dingtang kamrangchi an·chingni jakkalenggipa ku·sikrangko tang·doatna chinga nangnikenga,” ine Sangma aganaha.
Meghalaya a·doko jakkalenggipa ku·sikrangko tang·doatna gita ki·tap segipa aro am·sandienggipa manderangna sorkari, dingtangmancha tangka paisarangko on·e dakchakgen ineba ia tom·anio Chief Minister parakataha.