U·IATTIMGIPAONI
TURA: Re·anggipa Sonibar aro Robibar salgnina Tura Diocese-ni Golden Jubilee ba bilsi 50 gapaniko Tura-ni Sacred Heart gilja nok aro Tura-ni Don Bosco School kal·chakramo dal·bee maniangaha aro ia manianio bilsi 90-na skang Garo Hills-ona re·bae, Garo Hills-ni manderangna dingtanganiko ra·bagipa Italy a·songni Catholic Missionary-rangna dingtangmancha mittelpilskaani gita mande ra·pilskaanirangko dakangaha.
Ia manianiona Garo Hills-ni dambonga a·jarangonisan ong·aigija, Khasi Hills, Assam aro North Bengal jolrangoniba Catholic bebera·giparang tom·chimongbatoke bakko ra·angaha.
Sonibar salo, ia manianiko a·bachengatanio Tura-ni Bishop Most Rev Andrew R Marak, tom·bagiparangna rimchaksoani kattarangko aganangaha aro ia tom·anio Shillong-ni Archbishop Most Rev Victor Lyngdoh, Isolni namgipa kattarangko agane, tom·anio bak ra·giparangna pattianiko on·angaha.
Robibar salo, jinmani bi·aniko Northeast India Bishops’ Council-ni Chairman Most Rev John Moolachira dilangskaaha aro jinmana pattianirangkoba on·angaha.
Robibar salo, dingtangmancha a·dokni Chief Minister Conrad K Sangma-ba re·bae, cultural program-ko ong·atanio bak ra·angaha aro ia tom·anio a·dokni Chief Minister baksana Tura-ni MP Agatha K Sangma, Meghalaya Assembly-ni Speaker Thomas A Sangma, GHADC-ni CEM Albinush Marak aro gipin dilgiparangba bak ra·angaha.
Ia tom·anio a·dokni Chief Minister, jinmana aganprakangengon, Garo Hills-o lekka pora aro an·seng baljokani kamrangko nambatatna gita kamrangko ka·engani gimin Catholic Mondoliko mittelpilangaha.
“Ia salara Tura Diocese-ni bilsi 50 gapahaniko nikna man·ahani gimin kusi ong·ani aro mittelpilani sal ong·enga. A·chik a·songna bang·a manderangan, mongsongbate Pamongrang aro Missionary-rang an·tangtangko on·kange kam ka·aha. Missionary-rangni kamko an·ching maming dakeba gualna man·jawa, uni gimin jinmani pal anga Catholic Missionary-rangko mittelpilenga,” ine Chief Minister aganaha.
Tura Diocese-ni bilsi 50 gapaniko manianio dingtangmancha cultural aro dingtang dingtang program-rangkoba ong·atangaha aro ia program-rangko ong·atanio dingtang dingtang dolrang, jekai Mama Margareth’s Girls Hostel, Tikrikilla Parish-ni chadambe dol, St Peter’s Minor Seminary English Choir, Jubilee Choir, Paham Parish, Ruga Nokat, Fr Jimberth K Marak, Sanju M Sangma aro uandakgipa dolrangni git ring·ani aro dakmesokanirangko nikna man·aha.
Sonibar salo dingtangmancha Marian Procession-koba ong·atangaha aro ia procession ba re·jomaniko Araimile Parish dilangaha.