U·IATTIMGIPAONI
SHILLONG: Adita salrangna skang, ia bilsini Asia Pacific Screen Awards (APSA)-ko Australia a·songni HOTA Gold Coast-o ong·atanio, A·chikrangoni jawilwat tarianio mingsing minggamako man·gipa Dominic Sangma-ni ‘Rapture’ jawilwat, Cultural Diversity Award-ko man·aha.
Apsan salon, Jio MAMI Mumbai Film Festival-ko ong·atanioba Dominic Sangma-ni tarigipa ‘Rapture’ jawilwat, NETPAC Award-koba man·aha.
An·tangni ‘Rapture’ jawilwatna chegipa award minggnikon Dominic, A·chikrangna aro Meghalaya a·doko songdongenggipa manderangna pakwatataha.
A·gilsak gimikni film industry-o Dominic Sangma-ba uni nambegipa kamrangna bang·en award-rangko man·ahachim ine nikna man·a.
Uni kan·dikgipa ‘Karyukai Inc.’ jawilwatko 2010 bilsio Munich, Kosovo aro Venice songjinmarango ong·atanggipa international film circuit-rango mesokahachim aro uni ‘Rong·kuchak’ jawilwatba 2014 bilsio ‘Best Student Film’-na National Award-ko man·e, dingtang dingtang national aro international film festival-rango mesokpilahachim.
Uni tarigipa ‘Rapture’ jawilwatba Cannes-o La Fabriqe section-na seokako man·ahachim aro ia jawilwat minggnian international producer-rangni dakchakanichi tarichenggipa Meghalaya a·dokni Tribal jawilwatrangba ong·aha.
