U·IATTIMGIPAONI
SHILLONG: Election-ni somoio tangka paisarangko dakchake on·gipa mitam contractor-rangna NPP-chi dilenggipa MDA 2.0 sorkari, a·doktangkon ‘pale cha·aha’ ine a·dokni Trinamool Congress (TMC) matnangatenba, ramarangko name tarijaenga ong·ode Dhar Constructions company-ko blacklist ka·china sorkariko ra·biataha.
NH-206-ni ning·o donggipa Dawki-Amlarem-Jowai ramako name tarija ine matnangenba Jaintia Hills a·jao songdongenggipa manderangni nangrime bikotgipa Joint Action Committee (JAC)-ba Dhar Constructions company-ni kosako kachario mokordoma ka·na gita ka·mikkenatahachim ine nikna man·a.
“Dhar Constructions company-ni kamrangna manderangba suk ong·gijaniko paraktokahachim indiba manderangni badi ka·anirangko knachakgija donganian sorkarini, ia contractor-rangna mikkang niteaniko mesokani ong·a,” ine TMC-ni state vice president George B Lyngdoh parakataha.
Ia ramako tarianirang namja ine manderangni matnanganirangara kakket ong·bebegenchimode, ia kamna chamgimin tangka paisarangoniko baditaba bakrangkosan man·soaiaha aro mitam tangkarangde bachibasa napangaha ineba ua suk ong·gijaniko parakataha.
“Haida, batanggimin chang election-o koros ong·aniko gapatnasa uamang tangka paisarangko jakkalskaenggen. Indake ong·genchimode 2028 bilsini election-naba uamang bang·bate tangka paisarangko jakkalsretani cholrang donga,” ine Lyngdoh aganaha.
Dhar Constructions company-ni kosako kachario mokordoma ka·na gita JAC-ni tik ka·gipani gimin janapatengon, iandakgipa kamrangchisa manderangni namgnina sorkarini mikronrangko mikgaoatna man·gen ine TMC-ni dilgipa parakataha.
“Iandake kamrangko name ka·jani gimin jolo songdongenggipa manderang an·tangtangan ja·kurangko de·chakatahani gimin anga namen kusi ong·a. Meghalaya a·doko iandake tangka jakkalsretanirang ong·angkua ong·ode a·dokni gamchatgipa gam-jinrangde indin gimaaignok,” ine Lyngdoh aganaha.
Lyngdoh-ni parakatani gitade, a·dok sorkari iandake kamrangko ka·angkuaia ong·ode bon·kamao a·doko songdongenggipa manderangsa noksan ong·na nangtokaigenchim.
“Ia ramako name tarijaenga ine ma·siani ja·man a·dok sorkari, ia company-ko blacklist ka·genma?” ineba Lyngdoh sing·doataha.