North East TB Free Summit-ko ong·ata
SHILLONG: Mongolbar salo, North East Tuberculosis (TB) Free Summit ba salgro salaram a·dokrangko TB sabisioniko jakgitel ong·atna gita tom·e chanchirimaniko Shillong songjinmani Courtyard Marriot-o ong·atangaha aro ia summit-ko a·dokni Chief Minister Conrad K Sangma, do·ga oe on·angaha.
Ia program-ko ong·atanio a·dokni Health Minister Ampareen Lyngdoh, WHO India-ni WHO Representative (WR) Dr Roderico H Ofrin aro Health department-ni dingtang dingtang official-rangba bak ra·angtokaha.
Ia Summit-ko do·ga oe on·angani somoio a·dokni Chief Minister jinmana aganprakangengon, 2025 bilsini gisepon India a·songko TB sabisioniko jakgitel ong·atsrangna ma·mong sorkari nisanko donahaoba, ia miksonganiko chu·sokatna gitade, seng·gnang sanna bannanirangko ra·ani, rongtal an·talaniko rakkiani aro mongsongbate manderangni bakrimaniko nangchongmotenga ine parakataha.
An·seng baljokaniko on·aniba a·dok sorkarini mongsonggipa daitorangoni mingsa ong·enga ine janapatengon, batanggimin bilsirango, Meghalaya a·doko nambata sanna bannani cholrangko on·na gita bang·en tangka paisarangko koros ka·aha ine Sangma parakataha.
“Dingtang dingtang self help group-rango bak ra·enggipa me·chikrang tangka paisani gita obostarang namkalbatahani gimin an·tangtangkoba an·seng baljoke rakkina gita man·tokengaha aro iako an·o donggipa me·chikrangni siani, bi·sa bakgitchakrangni siani aro ma·manti sabisi sakanchi man·anirangko tosusaon iani dingtanganiko nikna man·engaha,” ine Chief Minister aganaha.
Meghalaya a·doko sanna banani kamrangna tangka paisa chamaniko sorkari bariataha ine janapatengon, ia tangka paisarangoni bang·batakon dingtang dingtang health mission-ni kamrangna aro a·dokni dingtang dingtang biaprango health & wellness centre-rangko kulina jakkalenga ine Chief Minister parakataha.
TB man·gipa manderang, mongsongbate kangal cholgrirang, saa bilongahaosa doctor-rangona re·bae porikkarangko ra·engani a·sel sanna bananirangko on·anio ja·manchakrongenga ineba Chief Minister parakataha.
Salgro salaram a·dokrango TB saaniko bon·atsrangna miksonganiko chu·sokgipa ong·atna gita Health department-o kam ka·enggipa pilak manderangkon rakbate kam ka·angkuchina gitaba Chief Minister didiangaha.
Ia tom·anio a·dokni Health Minister Ampareen Lyngdoh, WHO India-ni WHO Representative (WR) Dr Roderico H Ofrin aro Health department-ni dingtang dingtang official-rangba jinmana aganprakangaha.