U·IATTIMGIPAONI
TURA: November 9 tarikoni 11 tarikona Jengjal-ni Baljek Airport-o ong·atenggipa 100 Drums Wangala manianiko tom·tome aro name matchotatna man·na gita West Garo Hills a·jani police-rang, dingtangmancha gari gora jakkalgiparangna niamrangko donataha.
West Garo Hills a·jani Superintendent of Police (SP) Abraham T Sangma-ni u·iatani gitade, 100 Drums Wangala maniani somoio garirangko donchakna gita VVIP aro VIP-rangna Baljek Airport-ni Runway, delegate (official)-rangnaba Baljek Airport-ni runway, two-wheeler ba chakka samgni donggipa garirangna Baljek Airport sambao, 3 aro 4-wheeler-rangnaba Baljek Airport ning·o aro Heavy Motor Vehicle (HMV)/Bus-rangnade Baljek Airport-ni nakuram jakrao donggipa field-o biaprangko tarisoaha.
Ia Wangala manianiko ong·atengmiting somoio NH-217 Baljek-oni Jengjal tri-junction-ona kingkingde garirangko park ka·na ba donna man·jawa ineba SP u·iataha.
2-wheeler-rangko salengon pangnan helmet-ko ganchina, garirangko salengon seat belt-rangko ganchina aro bilsi 18 gapkugijagipa chadamberangkode garirangko salna on·jachina gitaba SP didiataha.
Wangala manienggipa biaprango skatang ‘horn’ on·jachina aro donsogimin biaprangona agrede garirangko skatang donjachina gitaba SP u·iataha.
Iani bidingo talbate u·ie ra·na sikgipa manderangde Police Control Room-ni 8837423053 aro 9089199064 nombor-rangona ka·e sing·sandiatna man·gen ine WGH-ni SP u·iataha.
