Baghmara Govt College-ni chang 32-gipa Foundation Day-ko mania
U·IATTIMGIPAONI
BAGHMARA: November-ni 7 tariko, South Garo Hills a·jani headquarter Baghmara-o donggipa Captain Williamson Memorial Govt College-ni chang 32-gipa Foundation Day-ko maniangaha aro ia manianio, a·dokni Education Minister Rakkam A Sangma, mongsonggipa sokgipa ong·e bakko ra·angaha.
Ia tom·bimonganio Education Minister, jinmana aganprakangengon, Capt Williamson Memorial Govt College-ko man·dile on·gipa Baghmara-ni gitcham MLA Lotsing Sangma baksana gipin dilgiparangko gisik ra·atpilangenba, South Garo Hills a·jani chadamberangna nambata lekka porako on·na man·na gita ia college-ko kulie on·ahani gimin mittelpilangaha.
College-o kam ka·anggipa gitcham principal-rang aro lecturer-rangkoba ua ia tom·anio mittelpilangaha.
Mikkangchi ia college-ko nambatatangkuna gita niksamsoani gnang daitoko ra·e kam ka·angkuchina gitaba Education Minister, ua college-o kam ka·enggipa pilak manderangkon didiangaha.
College-o skigiparangko aro pilak nanganirangko on·na sorkari dakchake on·gen ineba Sangma ku·rachakaniko on·angaha.
Captain Williamson Memorial Govt College-o Science aro Commerce stream-ko re·baenggipa bilsi dipet a·bachengatna sorkari rake kamko ka·enga ineba Education Minister, ia tom·anio parakataha.
Education department-o kam ka·giparangko rakkianio ta·rakbate kamko ka·na man·na gita Recruitment Board-ko MPSC-ni ning·o dongija dingtang donna sorkari miksongenga ineba Sangma aganaha.
College-o poraienggipa chatro chatrirangkoba ua, janggi tanganio chu·sokgiparang ong·na gita gisiko nange poraichina ku·pattianiko on·angaha.
Ia tom·bimonganio Education Department-ni Advisor HM Shangpliang aro dingtang dingtang official-rangba dongpae bak ra·angtokaha.
