U·IATTIMGIPAONI
SHILLONG: Re·baenggipa 2024 bilsini Lok Sabha election-o Shillong Parliamentary seat-oni susana gita Bharatiya Janata Party (BJP)-ni dilgipa aro Cabinet Minister AL Hek-ko man·chape gimik sakgittam candidate-rang, BJP-ni tikitna dorgastoko galenga.
Hek-ni parakatani gitade, Shillong Parliamentary seat-oni susana gita uko man·chape gimik sakgittam candidate-rang, BJP-ni tikitna dorgasto galenga aro BJP-ni dilgiparang, ia sakgittamoni nambatgipa candidate-ko seokanggen.
“Gipin sakgni candidate-rang sawarang ukode anga ma·sija indiba angko man·chape sakgittam candidate-rang, Shillong Parliamentary seat-oni susana gita tikitna dorgastoko galenga. Ia sakgittam candidate-rangoni sako dilgiparang seokgen, da·o dipet anga aganna man·kujawa,” ine Hek aganaha.
Shillong Lok Sabha seat-o ua an·tangba susana nangnikenga indiba ia pilakan ma·mongo BJP-ko dilenggipa manderangni skaniosa ong·aigen ine adita salrangna skangba Hek parakatahachim.
Trinamool Congress (TMC)-ni mitam dilgiparang BJP-o napna agangrikenga ine kobor on·gipani bidingo sing·anina aganchakaniko on·angengon, iani bidingo ua an·tangde maming kobor dongkuja aro TMC-ni dilgipa Dr Mukul Sangma, BJP-o napgenma napjawa uni giminba mamingkoba ma·sija ine Hek parakataha.
“BJP-ni do·gade TMC-ni dilgiparangnasan ong·ja indiba pilak political dolrangna oe dongenga,” ine ua aganaha.
