U·IATTIMGIPAONI
TURA: West Garo Hills a·jani a·kawe jolrango donggipa adita Fair Price Shop dealer-rang, 2020 bilsionin PDS-ni bosturangko jakkalsretaha ine All Meghalaya Minorities Labour Union (AMMLU) matnangatenba, ia FP Shop dealer-rangni licence-rangko den·galchina dabiangaha.
Iani bidingo Dadenggre Sub-Division-ni SDO (Supply)-na badi ka·e sedoatengon, Shidakandi-I aro II, Phersakandi-I, II aro III, Bowabari-I aro II, New Bhaitbari aro gipin biaprango donggipa FP Shop dealer-rang, 2020 bilsionin PDS-ni bosturangko jakkalsretaha ine AMMLU matnangatenba, ia FP Shop dealer-rangni licence-rangko den·galchina didiataha.
“National Food Security Act 2013-o pangchake ma·mong sorkari, COVID-19-ni ration-rang baksana manderangna nangchongmotgipa cha·ani bosturangko on·atrongengachim indiba ia FP Shop dealer-rang, PDS-ko man·enggipa manderangna mingsakosan on·e bosturangko an·tangtangni man·gnina jakkalsrettokaha,” ine AMMLU-ni president Akhirul Islam parakataha.
AMMLU-ni parakatani gitade, ia FP Shop dealer-rang, PDS-ni bosturangko sualanio, office-ni koros aro ra·baani koros ine pa·sikenba, nokdang ge·prakonikon, merong ata kg-koba kattiaha.
Bostu sualaniko see rakkianio, sualgijagipa bostuni bakrangkoba ia register-o uamang see rakkiahachim ineba Islam matnangataha.
Iani bidingo inquiry-ko dakchina gita Dadenggre-ni SDO (Supply)-ko didiatengon, songsalo iandake manderangni namgnina on·atenggipa bosturangko jakkalsretahani gimin ia FP Shop dealer-rangni licence-rangko den·galpilchina gitaba dabiangaha.
