U·IATTIMGIPAONI
SHILLONG: Ri Bhoi a·jani Byrnihat jolrango tangka dabie ra·ani gimin Ri Bhoi Youth Organisation (RBYO)-ni president Baiateilang Lapang-ko police-rang rim·aha.
Iani bidingo talataniko on·angengon, Byrnihat jolo donggipa petrol pump-oniko tangka dabie ra·a ine badi ka·anirangko man·soani ja·man RBYO-ni president-ko Bristibar attamchibara rim·aha ine Ri Bhoi a·jani Superintendent of Police (SP) Giri Prasad, kobor ra·timgiparangna parakataha.
Koborko on·ani gitade, Lapang-ko rim·e Nongpoh Civil Hospital-o medical check up ka·ani ja·man police-rang, Shillong-ona rim·angaha.
Adita salrangna skangsan, Hynniewtrep National Youth Front (HNYF)-ni president Bless Dkhar-koba police-rang, truck garirangoniko tangka dabie ra·ani gimin rim·ahachim ine nikna man·a.
Damsite aro Umiam dolong gita niamna bate bostu salruraenggipa truck garirangoniko HNYF-ni president, truck bolprako gong 1500/- ka·e dabie ra·aha ine matnangenba police-rang rim·ahachim.
HNYF-ni president-ko rim·ani ja·man skatang, garirangoniko ba dokkanrangoniko tangka dabie ra·jachina gita sorkari mikrakataniko on·angahachim.
