Shillong: Re·baenggipa bilsio district council election ong·na skang ua gipin je party-ni MDC ong·enggiparangni gipin party-ona watatna am·ani bidingo ua darangkoba bengja ine MPCC working president, PN Syiem Sukrobar salo aganaha.
“Congress dol a·doko da·o ge·sa dongkamgipa ong·a. Anga darangni risk ra·e gipin party-ona re·angko nikuja,” ine party-ni mitam MDC-rang NPP-ona napangaha ine gipenggipa kattana Syiem jechakate rongtale agan-talatangaha.
Mizoram, Chhattisgarh, Madhya Pradesh, Rajasthan aro Telangana-o assembly election-ni result-ko bang·a manderangan namen nianganiko dakenga ine ua aganaha.
Ia a·dokrango party name daka ong·ode, chol dongenga jeon re·baenggipa district council election-o chalaiangna Congress ticket-ko man·a bang·an sing·anggen, ine MPCC working president aganangaha.
Koborrangko man·soani gitade, agansona man·gijagipa MDC-rang jekai Mairang-oni party-ni MDC ong·enggipa Batskhem Ryntathiang gipin political party-rango napangnaba donga, MPCC President Vincent H Pala mijamangmang aganangaha, “Anga ma·sija maina Mairang MDC mijamangmang ong·atgipa party tom·anio dongpaaha.” Saobarang gipin party-rangona napanggenma napangjawa iani bidingo anga gipinrangni giminde agansona man·ja maina district council gipinona wate re·anganina maming policy taria dongja,” ine ua agandapangaha.
Khasi, Jaintia aro Garo Hills-rangoni mongsonggipa dilgiparang Congress-ko chalaianganio uamangni gisiko sikaniko mesokangna party-ona re·mikkangaha, ine parakangaha, “Saksa ba sakgni party-ko watanggenma anga aganna man·ja indiba kakketde ian bang·rangan angna re·baenggipa election-na party-o napna call ka·atenga.”
Syiem bijangchio aganangaha, party ticket-rangko sualna kamrangko party a·bachengatkujaenga.
Ua bebe ra·a jeon Congress dol ta·rake re·chakatna nangnikja maina ian party-ni organisation-ni system llocal level-ona name dake kamrangko ka·angaha.
“Jensalo chinga party ticket-rangna dorgastoko galna a·bachengatgen, block congress committee aro district congress committee-rangoni party candidate-rangko dongija somoio chinga namnike ra·chakanggen,” ine Syiem aganangaha.
Iarangna mikkang done chanchianio, re·baenggipa bilsini MDC aro Lok Sabha election-rangna party-ni tarisamsoaniko Pala parakataha.
“February ba gipin chango election-ko ong·atgenchimoba chinga ra·bianirangna kam ka·angna tarisamsoa. Iarangko maidake jako ra·e ka·anggen state adminsitration nirokanggen,” ine Pala aganangaha.
Re·baenggipa election-na KHADC aro JHADC-ni candidate-rangna uamangni namnike ra·bagipako ra·angna kamrangko ka·anggen, party pilak block-rangna lekka seanggen, ine ua agandapangaha.
November jaoni kamrangko a·bachengataha aro December jao list-rangko ong·katatgen, jeon election result baksa bijangchio candidate-rangko parakatna miksongani ong·a ine Pala a·kange aganangaha.
MPCC Chief-ni parakatani gitade, state election committee aro district election committee-rang kam ka·engaha aro candidate-rangko ta·raken seokanggen.
MP aro MDC election-na candidate seokanio apsan niamrangko jarikanggen, ine ua aganangaha.
“ADC election susana MLA-rangna niamrangko on·anga baksana party maming jegalani dongja” ine Congress dilgipa aganangaha, ADC poll re·baenganio ticket-na MLA-rangba galna man·anggen ine parakataha.