U·IATTIMGIPAONI
SHILLONG: Sonibar salo, Ri Bhoi a·jani Kpepsyiem songo, mande sakgni bijoli sala man·e siangna gita nangaha.
Kobor on·timgiparangni u·iatani gitade Umden La-ang songni bilsi 65 ong·gipa Lal Lapang aro bilsi 44 ong·gipa Pian Namsaw, Sonibar walo, Kpepsyiem songona re·angahachim indiba ua songo uamang bijoli sala man·enba siangna gita nangaha.
Ia mande sakgnini manggisiko Robibar pringni 8:30 bajimangosa songni manderang nikaha aro ja·mano police-rangna kobor on·ataha.
A·sel ong·gipa biapona sokangani ja·man police-rang, ia mande sakgnini manggisiko post mortem ka·na gita Byrnihat CHC-ona watatahachim indiba sianggipa mande sakgnini nokdangrang, uamangni manggisirangko post mortem ka·jachina mol·molahani gimin ja·mano manggisirangko uamangna pakwate on·ataha.
