U·IATTIMGIPAONI
SHILLONG: Meghalaya a·doko Accredited Social Health Activist (ASHA) worker-rang, an·tangtangni dabianirangko knachakjaengani gimin sorkarini kosako jingjengatanirangko dakengon, West Khasi Hills a·jaoba bang·bea ASHA worker-rang, an·tangtangni man·gnirangko bariatchina dabie Sombar salo, re·jomaniko ong·atangaha.
ASHA worker-rangni jinma re·jomaniko Nongstoin Maternal & Child Health Hospital-o a·bachengatenba, New Nongstoin Market Complex-o jinma tom·bimonganiko ong·ate matchotataha.
Ia tom·anio dingtang dingtang dilgiparang, jinmana aganprakangengon, ASHA worker-rangna on·enggipa dormahako hisapgenchimode salo uamangni man·enggipa hajirara gong 66-mangsan ong·aia indide uamang maikai, nokdang chalaina man·gen ine suk ong·gijaniko parakattokaha.
ASHA worker-rangni man·gniko japrako gong 2000-oniko gong 5000-ona bariatchina gita dabiengachim indiba sorkari, da·o dipet ASHA worker-rangni dormahako bariate on·ani bidingo mamingkoba janapskakujaengachim ine nikna man·a.
“Chingna japrako on·enggipa gong 2000/- dormahako gong 5000-ona bariatchinasa chinga dabiengachim indiba sorkari chingni dabianiko knachakjaengani gimin chinga dontonggija jingjengatna tik ka·aha. National Health Mission-onikoba chinga tik ka·gimin dormahakode man·jaenga indiba bang·a bang·ja man·gnirangkosan man·paenga,” ine ASHA worker-rangni tom·bimonganio dilgiparang aganaha.
West Khasi Hills a·jao ASHA-rangni jinma re·jomaniko ong·atanio Meghalaya ASHA Workers Union-ni president M June Myrsing aro dingtang dingtang unit-ni dilgiparangba bak ra·angtokaha.
