U·IATTIMGIPAONI
SHILLONG: North Eastern Hill University (NEHU)-o niam grisa Rohit Prasad minggipa mandeko technical officer/senior consultant-ni kamo ra·aha ine matnangenba, uko kamoniko ta·raken ra·galpilchina dabie, NEHUTA, NEHUSU aro NEHUNSA dolrangni nangrime bikotgipa Joint Action Committee (JAC), November 13 tarik dipet ‘indefinite strike’-ko ong·atna tik ka·ahaon, da·o dipet ia mandeko kamoniko ra·galpilani bidingo NEHU-ni Vice Chancellor Prabha Shankar Shukla, maming ku·rangko on·na dongkujaenga ine JAC parakataha.
“Da·o dipet Prasad-ko ra·galpilani bidingo NEHU-ni VC maming ja·kurangko de·kujaenga aro Model UGC Cadre Recruitment Rules baksana NEHU-ni dingtang dingtang niamrangko pe·ani giminba ua mamingkon parakkujaenga. JAC baksa agangrikna gitaba ua da·onan chittirangko seata dongkujaenga,” ine JAC-ni chairman Prof Lakhon Kma parakataha.
University-o ong·enggipa obostarangko namatna cholrangko sandiani pal ua (VC), November 9 tarikoni 15 tarikona kingking chutti ra·e gipin biaposa an·senge roskaenga ineba Prof Kma matnangataha.
“Haida ua (VC), chatro chatrirangni janggi tanganiko aro university-o tom·tome donganiko nosto ka·na sikgipasa ong·akon,” ine JAC-ni chairman aganaha.
University-o class-rangko ra·ani maming nangchakeani dongjana gita NEHU-ni VC, da·o university-on ong·na gita nangachim aro skigiparang baksa meligrikgijanirangko namatna gitasa jotton ka·na nangachim ineba ua aganaha.
NEHU-ni statutory officer-rangko aro university engineer-ko songani bidingo janapatengon, songbadrango seani gita ia kamrangna interview-ni tarikrangko tik ka·bebeaha ong·ode uan JAC-ni petchal ka·ahani giminsa ong·aigen ine Prof Kma parakataha.
