U·IATTIMGIPAONI
SHILLONG: North Eastern Hill University (NEHU)-o NEHUTA, NEHUSU aro NEHUNSA dolrangni nangrime bikotgipa Joint Action Committee (JAC)-ni dabianirangko NEHU-ni Vice Chancellor PS Shukla knachakjaengani a·sel, dolgnini gisepo meligrikgijanirangko nikna man·engon, university-o poraienggipa chatro chatrirangni namgnina dolgnini gisepo ma·sisretani aro golmalrangko ta·raken namatchina gita Meghalaya a·dokni Trinamool Congress (TMC) didiataha.
“Sawa ong·a sawa ong·ja anga an·tangde mamingkoba ma·sipaja indiba ramram mande ong·e chanchienba chinga, university-ni namgnina aro mongsongbate chatro chatrirangni namgnina ia meligrikgijaniko namatchina gita skigiparangko aro NEHU administration-ko didina ska,” ine TMC-ni state vice president George B Lyngdoh aganaha.
Dolgnini gisepo meligrikgijaniko namatna maibade chol dongna nanga ineba ua aganaha.
North Eastern Hill University (NEHU)-o Joint Action Committee (JAC)-ni dabianirangko knachakna gisiko nangjaengani gimin NEHU-ni Vice Chancellor (VC) Prabha Shankar Shukla-ko jegale, ‘indefinite strike’-ko ong·atna tik ka·angahachim.
Niam gri technical officer/senior consultant-ni kamna seokako man·gipa Rohit Prasad-ko ta·raken kamoniko ra·galpilchina, statutory officer aro university engineer-rangko ta·raken songchina, University Health Centre-ko namdapatchina aro NEHU-ni skigiparang aro technical staff membor-rangko ministerial duty-rangoniko watchina dabie JAC, November 13 tarikoni dontonggija jingjengatna a·bachengatahachim.
Dolgnini gisepo meligrikgijanirangko namatchina didiatengon, “Ia meligrikgijaniko namatna man·chipjagenchimode aro dolgnini gisepo iandake golmalrang ong·angkuaigenchimode, university-o poraienggipa chatro chatrirang aro university-o pangchakenggipa manderangsa neng·nikanirangkode man·aigen. Dolgnini gisepo golmal ong·ani da·o baditaba jarang ong·pilengahani gimin ta·raken ia meligrikgijaniko namatchina chinga mol·molenga,” ine TMC-ni state vice president parakataha.
