U·IATTIMGIPAONI
SHILLONG: Re·baenggipa 2024 bilsini Lok Sabha election-o susana gita Trinamool Congress (TMC) Meghalaya-ni vice president George B Lyngdoh, National People’s Party (NPP)-o napskana sienga ine jangbingbanganiko ua raken jegalataha aro da·o dipet ua TMC-ko watna miksonganirang dongkuja ine talataniko on·angaha.
TMC-ko wate NPP-o napangskagenma ine sing·anina aganchakaniko on·angengon, “Anga TMC baksa ong·kuenga,” ine Lyngdoh parakataha.
Koborko man·soani gitade, TMC-ni vice president-ko NPP-o napatenba, re·baenggipa bilsini Lok Sabha election-o NPP-ni candidate ong·e susachina NPP-ni dilgiparang nangniktokahachim.
NPP-ni dilgiparang uko sing·e niarang dongachimma ine sing·anina aganchakaniko on·angskaengon, “Maming official gita ong·gija agangrikanirangde donga. Gipin dolrangba agangriktokenga aro Congress-ba agangrikenga. Chinga gipin dolni membor-rang baksa agangrikengon, gipin dolrangba ching baksa agangrikskaenga. Agan-chanchirimaniode maming ong·gija dongja,” ine Lyngdoh aganaha.
Mitam kobor on·timgiparangni u·iatani gitade, George Lyngdoh-kosa NPP-ni dilgiparang, NPP-ona rimbae Shillong Parliamentary seat-o susaatna nangnikanirang dongachim indiba Shillong seat-o Dasakhiat Lamare-ko NPP-ni candidate ong·atchina Dhar brothers, NPP-ko aganahani gimin NPP-ni dilgiparang chanchianiko dingtangatna nangahachim.
Iani bidingo sing·anina aganchakaniko on·angskaengon, “Iandakgipa ja·ku de·anirangde dongjachim aro manderang iandake chanchichipenga inede anga an·tangan ma·sijachim. NPP-ni gisepo iandakgipa agan-chanchirimanirang donggenchimode anga an·tangba ma·sigenchim ine adita salrangna skangsan anga kobor ra·timgipa mitam manderangnaba aganaha,” ine TMC-ni state vice president parakataha.
