U·IATTIMGIPAONI
TURA: West Garo Hills a·jani a·kawe jolrango, niam gri saw mill-rang baksana da·o ro·ong quarry-rangko niam gri chalaianiba batroroengaha ine kobor on·aha.
Batanggimin somoirangoba ia jolrango, iandake niam gri ro·ong quarry-rangko chalaiani gimin niam gri chalaienggipa ro·ong quarry-rangko chipatchina Meghalaya High Court ge·etaniko on·ahachim aro High Court-ni ge·etaniko on·ani ja·man, ro·ong quarry-rangko chipattokahachim. Iani ja·man, bilsisamangnade niam gri ro·ong quarry chalaigiparang dongjahachim indiba da·o ia jolrango ro·ong quarry-rangko niam gri bikotna a·bachengtoktaiengaha ine kobor on·timgiparang parakataha.
Kobor on·timgiparangni parakatani gitade, ia biaprangara GHADC-ni ning·o ga·akgipa biaprangan ong·achim indiba ia jolrango maming permission ra·chenggija da·o komibeoba dam 10-mangni gita niam gri chalaienggipa ro·ong quarry-rang dongaha.
Jolo songdongenggipa manderangni u·iataniko man·soani ja·man, Phulbari jolo donggipa Gomaijhora songona re·ange nion, ramarango GHADC-ni check gate-rangkode donga ine songni manderang agantokaha indiba ia jolrango niam gri chalaienggipa ro·ong quarry-rangni kosako maming ja·kurangko de·jaenga ine parakattokaha.
Ia check gate-rango, ro·ong aro bol salgipa truck garirangonikode kajinarangko gilenga indiba niam gri chalaienggipa ro·ong quarry-rangkode nirokna gisik nangjaenga ine kobor on·timgiparang parakataha.
Koborko on·ani gitade, batanggimin somoirango ia biaprango ro·ongrangko bikotna gita dynamite-rangkoba jakkalachim aro ian ia jolo songdongenggipa manderangnasan ong·aigija samtangtango ong·telaigiparangnaba nangchakeaniko ra·baahachim.
“Ia jolrango komibeoba dam 4 ba dam 5 ro·ong jetgipa karkanarang baksana quarry-rangba donga. Ia quarry aro karkanarangko chalaienggipa manderang maming lekkarangba dongja inen chinga ma·sienga indiba uamangko nirokgiparang dongjaenga. Ia songo GHADC-ni chongipa gate damsaba donga indiba ia gate-ara GHADC-ni mesokna maming chinrangba dongja. Ia gate-ko sakgittam ba sakbri manderangsan chalaienga. Ia gate-o ro·ong aro bol salbaenggipa garirangoniko kajina gilana agrede maming check ka·ani kamrangba dongja,” ine Gomaijhora songni mande saksa parakataha.
Iani bidingo GHADC-ni Chief Forest Officer Rangku Sangma-o sing·sandiaton, ia biaprango ong·enggipa obostarangko sandirokna gita ua inquiry team-ko watatgen aro nanga gita ja·kurangko de·anggen ine ku·rachakaniko on·ataha.
