U·IATTIMGIPAONI
SHILLONG: Meghalaya a·doko re·baenggipa 2024 bilsini Lok Sabha election-na pilak political dolrangan tarisamsotokengahaon, da·o dipet Meghalaya a·dokni Trinamool Congress (TMC) dolde, a·dokni Shillong aro Tura Parliamentary seat damgnion susagenma susajawa name tik ka·na man·skakujaenga.
West Bengal a·dokni Cabinet Minister aro TMC Meghalaya Unit-ni in-charge Manas Bhunia-ni kobor ra·timgiparangna parakatani gitade, Meghalaya a·dokni Shillong aro Tura parliamentary seat-rango TMC susagenma susajawa, uko TMC-ni high command-sa tik ka·anggen.
“Meghalaya a·dokni Lok Sabha seat-rango chinga susagenma susajawa name chanchia dongkuja indiba name tik ka·manahaon chinga jinmana u·iatgen,” ine Bhunia aganaha.
Kobor on·timgiparangni u·iatani gitade, ia 2023 bilsini Meghalaya Assembly election-o TMC, namgipa result-rangko man·jahani gimin High Command-ni dilgiparang suk ong·tokjahachim aro uandaken da·o Lok Sabha election-oba susagenma susajawa da·o dipet name tik ka·kujaengachim.
