U·IATTIMGIPAONI
TURA: Budbar salo, World Diabetes Day-ko maniani bak gita Tura Community Science College-ni ning·o donggipa Food Science & Nutrition Department, West Garo Hills a·jani District Medical & Health Office baksa bakrime, West Garo Hills a·jani medical officer-rangna ‘Medical Nutrition Management of Diabetes Mellitus’-ni bidingo workshop-ko ong·atangaha.
Ia workshop-ko ong·atanio West Garo Hills a·jani DM&HO Dr Bijay Deb Barma mongsonggipa sokgipa ong·e bakko ra·angaha aro ia workshop-o gimik sak 39 medical officer-rang, district trainer-rang aro MLHP-rang bakko ra·angaha.
Ia workshop-o Tura Civil Hospital-ni Diabetologist Dr Cynthia R Marak, saksa mongsonggipa skigipa ong·e medical officer-rangna aganprakengon, diabetes-ko sanna banani bidingo agan-talatanirangko on·angaha.
Diabetes saaniko sananio somoi gita cha·na ringna nangani gimin, be·enni gita ranta ka·jringna nangani gimin aro somoi gita tusina nangani giminba Dr Marak aganangaha.
Ia workshop-ko ong·atanio medical officer-rangna agan-talate on·anggipa gipin manderangara, Guwahati-o donggipa Ayursundra Super Speciality Hospital-ni HOD (Nutrition & Dietetics) Dr Mitali Rajkhowa, Community Science College-ni Assistant Professor Dr Natasha R Marak, Community Science College-ni Dean I/c Dr Namita Singh aro gipinrang ong·a.
